Pas bllokimit të domain-it, qeveria mbyll “Jeta osh Qef” edhe në Facebook

Prej disa muajsh portali, “Jeta osh Qef” po publikonte një seri dokumentesh që vërtetonin abuzime dhe vjedhje skandaloze me anë të tenderave.

Por, një gjë e tillë duket se nuk i ka pëlqyer qeverisë, që sot ka ndërmarrë veprimin e rradhës kundër portalit në fjalë.

JOQ Albania prej një viti po informonte vetëm nëpërmjet platformës sociale Facebook, pasi në nëntor të vitit 2019 qeveria nëpërmjet AKEP e bllokoi këtë faqe kritike ndaj qeverisë, ku në shumicën e rasteve publikohen denoncimet pa censurë të qytetarëve.

Së fundmi kjo faqe, me mbi 2 milionë ndjekës, është mbyllur edhe nga Facebook, pas një morie raportimesh që nuk dihet nga e kanë adresën.

Në 30 nëntor të vitit të shkuar, pas paralajmërimeve të kryeministrit Edi Rama kundër portaleve. AKEP, e bllokoi pa asnjë argumentim serioz domain-in  e JOQ, duke pamundësuar vizitimin e saj nga të gjithë ata që jetojnë në Shqipëri. Që prej atëherë, ajo ka funksionuar në Facebook, por sot as nga këtu nuk mund të ndiqet më.

Mbylljen e “JOQ Albania” në Facebook e konfirmon edhe administratori i portalit Gentian Çekeli, përmes një postimi në rrjetet sociale. Sipas tij, pas këtij sulmi ka një prapavijë politike nga grupe pranë qeverisë që kanë reportuar faqen në Facebook.

“Lajm i mirë për politikanët! Pas mbylljes së website-it, armata e sufllaqeve mbyll edhe JOQ Albania në Facebook. Lufta vijon…”. shkruan ai.