Dy ministrat e LSI-së, Edmond Panariti dhe Klajda Gjosha, si të vetmen zgjidhje shohin rikthimin e opozitës në Parlament.
Panariti është shprehur se shumë shpejt do të ketë kompromis mes palëve politike.
“Së shpejti do të kemi një kompromis dhe ulja në tryezë është shkëputje nga agresiviteti. Dy palët janë të ndërgjegjshëm dhe duhet të ulen në tryezë për dialog. E rëndësishme është që të fitojnë reformat. Fryma e dialogut shpejt do të japë frytet e saj. Fryma e dialogut është kryesorja. Të rikthejmë opozitën në Parlament, LSI ka shprehur predispozicionin e saj për të qenë pjesë me aleancën e majtë”, tha Panariti.
Ndërsa Gjosha tha se një tryezë të përbashkët e partive politike, do t’i japë një zgjidhje vendit.
“Unë mendoj që ulja në një tryezë të përbashkët e partive politike do t’i japë një zgjidhje vendit. Dialogu gjithnjë sjell zgjidhje dhe jo ngërç. Kështu që le të provojmë me dialog për t’i dhënë zgjidhje vendit, jemi në prag të zgjedhjeve”, tha Gjosha.
Ashtu si Ilir Meta dy ditë më parë, kur foli për garanci, por jo për afate për të arritur një zgjidhje mes palëve, përmes tryezës së dialogut, edhe ministrat e LSI-së nuk flasin për një ftesë konkrete, orë apo datë për një takim të tillë.
