Shoqatat e Gazetarëve do të vazhdojnë betejën ligjore kundra ligjit të miratuar dje në Kuvend, e njohur si paketa “anti-shpifje”. Me anë të një deklarate Shoqata e Gazetarëve ka dënuar miratim nga Kuvendi dhe kanë treguar hapat që të do të ndërmarrin për rrëzimin e këtij ligji.
Hapi i parë i ndërmarrë nga shoqatat e gazetarëve është kërkesa drejtuar presidentit Ilir Meta, për të mos dekretuar ligjin e miratuar dje. Sipas tyre, shumë shpejt do të nisë një fushatë informimi dhe ndërgjegjësimi mbi lirinë e shprehjes dhe lirinë e medias.
Madje, Shoqata e Gazetarëve shpreh angazhimin për ta ndjekur dhe rrëzuar ligjin në instancat më të larta, siç është Gjykata Evropiane e të Drejtave të Njeriut.
Organizatat e medias iu bëjnë thirrje gazetarëve të vijojnë punën për të raportuar drejtë dhe saktë. Si dhe të mos frikësohen nga këto ligje që i cilësojnë si kthim mbrapa. Ndërsa angazhohen të mbështesin çdo gazetar që mund të përballet me padrejtësitë që mund të prodhojnë ato.