Osmani e Kurti letës Europa Nostra-s që Manastiri i Deçanit s’është i rrezikuar

Presidentja Vjosa Osmani dhe Kryeministri Albin Kurti i kanë dërguar një letër organizatës Europa Nostra, ku janë shpalosur argumentet përse Manastiri i Deçanit nuk i plotëson kriteret për të hyrë në programin e “Shtatë monumenteve më të rrezikuara”.

Në letrën e dërguar nga Osmani e Kurti thuhet se në sulmet e pretenduara ndaj manastirit, gjuha e përdorur nga nominuesi është e pasaktë, duke qenë edhe tendencioze dhe e papranueshme, njofton Klan Kosova.

“Termi ‘ekstremistët lokalë’ është cilësim i ekzagjeruar qëllimshëm, ndërsa sulmi i pretenduar nga organizata terroriste ISIS është totalisht i pabazuar në fakte. Kjo gjuhë na bën të besojmë se teksti i nominimit nuk ka ndjekur linjë profesionale të argumentimit, dhe ka devijuar në përmbajtje me ngarkesa politike dhe propaganduese. Dëshmia më e mirë është mungesa e burimeve të besueshme mbi të cilat bazohen këto konstatime tendencioze”.

Sqarim: Kjo letër është dërguar më datë 18 mars 2021, derisa Osmani ishte ushtruese e detyrës së presidentes; ndërsa Kurti ishte kandidat për kryeministër. /klankosova/