Analisti Arben Meçe ka komentuar protestat e opozitës, duke thënë se ato janë të ligjshme, por që nuk prodhojnë më frymën e dikurshme dhe entuziazmi i tyre bie me çdo tubim.
Sipas tij, protesta e 8 shkurtit pritet të jetë edhe më e dobët se ato të mëparshmet. Ai theksoi se protesta pasqyron atmosferën dhe frymën e sheshit, dhe se pas disa tubimeve, nuk ka pasur rezultate të prekshme, përveçse një mungesë fryme dhe entuziazmi.
Ai e konsideron këtë një strategji jo optimale, pasi nuk ka pasur asnjë ndryshim të dukshëm nga këto aksione deri tani.
“Është e drejta e opozitës për protesta apo edhe për mënyrën se si i bën, me apo pa sherr, në parlament apo jashtë tij. Çdo forcë llogarit nëse fiton me këtë aksion apo penalizohet dhe është e drejtë e saj. Por ne analizojmë nëse fiton apo jo dhe pas çdo proteste ka bërë, nuk ka rezultuar në analizat e bëra se ka pasur përfitime. Pra, kjo lloj strategjie nuk është optimale deri tani. Protestat janë pasqyrimi i frymës në sheshe, e prodhon fryma sheshin dhe jo e kundërta. Nëse më parë kishte një lloj fryme të rëndësishme, por nga analiza e fundit e protestave nuk rezulton se kanë prodhuar ngjarje, ku kjo frymë nuk ekziston në shesh, mungon kjo frymë dhe mendoj se në ballafaqim me paraardhëset do jetë më e dobët, s’do jetë e njëjtë”, tha ai.
