Operacioni i SPAK çon në burg ish-kandidatin e LSI

Operacioni i kryer në Skrapar, bëri që të nxirreshin 23 urdhër-arreste për kultivim të lëndëve narkotike. Mes të dyshuarve, dyshohet të jenë edhe zyrtarë dhe efektivë.

Edmond Zotkaj është një nga emrat i cili mendohej të kishte lidhje gjaku me kryetarin e Bashkisë së Poliçanit, Adriatik Zotkaj.

Kryebashkiaku Zotkaj thotë se nuk ka lidhje gjaku me të dyshuarin në fjalë, dhe tregon se i arrestuari ka qenë kandidat i LSI-së për kryetar komune në vitin 2011.

Ai tregon se para 2-3 muajsh e kishte larguar nga puna atë dhe 3 kryepleq të tjerë, sapo policia e Beratit i ka treguar për përfshirjen e Zotkajt në kultivimin e kanabisit në Tërpan, sektor që mbulohej nga ky i fundit.

“Edmond Zotkajn nuk e kam kushëri, nuk e mohoj gjakun nëse do e kisha. Është banor i zonës, ka qenë i punësuar, por nuk e kam kushëri.

2-3 muaj më parë, kur janë bërë verifikimet e para nga policia dhe e kanë thirrur në polici, unë e kam pushuar menjëherë nga puna, i kam edhe urdhrat e pushimit.

Sa jam bërë me dije me këtë akuzë, e kam larguar nga puna. Kam larguar edhe 3 kryepleq të tjerë në fshatrat që ka pasur sinjalizime nga policia dhe punonjës pyjorë që kanë detyrë të mbrojnë territorin, por që nuk kanë kryer detyrën.

Edmond Zotkaj ka qenë kandidat i LSI-së për kryetar komune në vitin 2011, por nuk ka fituar. E largova nga puna sapo më vunë në dijeni nga policia e Beratit që Zotkaj ishte thirrur nga policia në lidhje me kultivimin e kanabisit në Tërpan, ku ai mbulonte sektorin. Kjo ka ndodhur 2-3 muaj më parë”, është shprehur kryetari Zotkaj për “Report TV”.

Lexo edhe :   SPAK, një qen roje i PS