“Ndërtojnë kështjella në Shqipëri”/Prokurori italian flet për mafiozët shqiptarë

Prokurori i AntiMafias italiane, Nicola Gratteri shprehet se në Shqipëri mund të bëhesh papritur i pasur dhe askush nuk të kërkon llogari. Sipas tij, kjo vjen si pasojë e korrupsionit në administratën shqiptare.

Gjatë një interviste dhënë për “Ora News”, Gratteri tha se me paratë e fituara nga shitja e drogës në Itali, kriminelët investojnë të ardhurat e tyre në Shqipëri duke ndërtuar “kështjella”.

“Përveç grabitjeve në vila e grabitjeve në Tiranë. Aktiviteti më i rëndësishëm i tyre në Itali është shitja e drogës e me paratë e fituara më pas shkojnë në Shqipëri e ndërtojnë kështjella. Për momentin në Shqipëri masat parandaluese nuk janë si në Itali, është e vështirë t’i sekuestrosh të mirat materiale mafiozëve të vëna në rrugë të paligjshme. Në Shqipëri është e lehtë që papritur të bëhesh i pasur e askush nuk të thotë gjë”, tha prokurori Nicola Gratteri.

Ndër të tjera, theksoi se fenomeni i korrupsionit në Shqipëri nuk të lejon të kryesh hetime të forta e vendimtare.