Aktualitet

Ndërhyrja e NATO në Kosovë/ Meta zbulon detaje nga 1999, festa që iu pre në mes


               Publikuar në : 11:44 - 18/01/20 M P

Presidenti Ilir Meta ka kujtuar eksodin masiv të shqiptarëve nga Kosova 20 vite më parë duke përcjellë detaje nga përjetimi që ka pasur në atë kohë. Ai ka kujtuar 24 marsin, ditën kur NATO filli bombardimet ndaj Serbisë, ditë që përkonte me 30 vjetorin e tij të lindjes.

Për të, viti 1999 ishte një vit i jashtëzakonshëm për historinë e Ballkanit dhe për kombin tonë tha Meta në fjalën përshëndetëse në Akademinë Solemne “Faleminderit Shqipëri”, të organizuar nga Ipeshkvia e Dioqezës Prizren-Prishtinë.

“Edhe pse 24 marsi është ditë e jashtëzakonshme, për mua është ditë e veçantë, kisha 30 vjetorin por s’pata mundësinë ta festoja për shkak se për mua e çdo shqiptar nisi ndërhyrja e NATO për ti dhënë fund gjenocidit e barbarisë në Kosovë. Kishte nisur një dhimbje e vështirë që do zgjaste për muaj deri në çlirimin e Kosovës, një dhimbje e përgjakshme me vuajtje pafund”, u shpreh Meta.

Sipas Metës, atë vit, shqiptarët treguan anën e tyre më të mirë, solidariteti me njëri-tjetrin ishte ccelësi që fshihej pas përballimit me sukses të krizës humanitare që pasoi.

“Falënderime për kryeministrin e asaj kohe zotin Majko, presidentin Meidani, për gjithë forcat politike edhe pse vinin nga një ndarje e thellë e ’96-’97 të gjithë u bënë një trup i tërë për të përballuar atë eksod biblik e për të mirëpritur vëllezër e motra nga Kosova. Shqipëria e kishte për detyrë të përballonte atë krizë të jashtëzakonshme humanitare që erdhi nga Kosova për shkak të gjenocidit të Millosheviçit”, tha kreu i shtetit.


Kthehu
WhatsApp Denonco ne TT