Nga Anxhela Ferra
Në ditët e sotme të gjithë kërkojnë produkte bio, të lodhur nga ushqimet e deri tek ilaçet me kimikate, njerëzit po i drejtohen sërish natyrës. Shqipëria është një vend i bekuar për bimët mjekësore, duke qenë një nga eksportueset kryesore në botë. Një ndër to është edhe sherebela autoktone ‘albanian sage’, e cila mbulon 70% të tregut amerikan.
Por, përsëri në disa raste, këto bimë prodhuese dëmtohen nga banorët e zonave, të cilët nuk e dinë sesi mund të vilen. Për këtë arsye mjeku alternativ Hysni Dankshi në një intervistë për Tirana Today thekson nevojën e krijimit të një fabrike prodhimi.
Pasi në Shqipëri tashmë ekzistojnë vetëm disa farmaci të cilat i tregtojnë barnat bimore, pjesa më e madhe të importuara nga shtete të tjera. Edhe pse këto të fundit lëndën e parë kryesisht e marrin në vendin tonë.
“Si gjithë vendet e tjera duhet të kemi dhe në një fabrikë të prodhimit të ilaçeve bimore. Derisa ne kemi bimët pse t’i çojmë në Amerikë dhe Kanada?! Jemi shteti më i pasur me bimë mjekësore, por njerëzit nuk kujdesen sepse ende nuk e kanë krijuar atë konceptin që bima është ajo e cila shëron sëmundje.
Edhe qeveria e di që ne kemi një vend të pasur me bimë medicinale, por mbase ato nuk kanë interesin e madh si për ilaçet sintetike. Ne i shkelim me këmbë, pa e ditur që ajo është një bimë e cila shëron sëmundje, ftohje, gëlbazë, temperaturë.
Disa nga ato trajtime zgjasin më shumë e të tjera më pak. P.sh., po të jesh me gjëndrat tiroide, me mungesë apo tepricë jodi duhet të marrësh mjekim 6-8 muaj. Por, jo mjekim të përjetshëm siç është në krahun tjetër me medikamente sintetike.
Në shumë raste mjekësia alternative ka evituar dhe ndërhyrjet kirurgjikale, p.sh., për një gur të vogël a një gjëndër nuk ka nevojë të operohet. Mund të shkrihet shumë lehtë me këto barna mjekësore.”
Doktor Dankshi e lidh aftësinë e jashtëzakonshme të barnava bimore edhe në trajtimin e qelizave kancerogjene apo sëmundjeve të tjera të pashërueshme. Sipas tij mjafton të kapet në kohë.
“Të gjitha sëmundjet shërohen me bimë, pra çdo bimë shëron një sëmundje dhe çdo sëmundje shërohet nga një bimë. Deri te qelizat kancerogjene dhe sëmundjet e rënda të shekullit. Me këto medikamente nuk ngordhen qelizat e shëndosha, rrit imunitetin dhe rezistencën. Në anën tjetër përballon situatën dhe sëmundjen. Dhe pse një pacient mos ta provojë kur me ilaçe sintetike nuk po shohin rezultatet e duhura. Atëherë edhe kanceri, edhe leucemia, edhe sida kur kapen në fazën fillestare ato kurohen me ilaçe e çajrat bimorë që janë në natyrë.
Unë kam pasur shumë raste të tilla, që kur janë kapur në kohë janë shëruar. Unë nuk them që shëroj kancerin, sepse ajo gjithmonë varet se në çfarë faze vjen pacienti te mjeku. Sa më pak ilaçe kimikate dhe sa më shumë bimë natyre, sepse është njëjtë si me ushqimin që kërkojmë vetëm bio dhe më pak me hormone.”
Mjekësia popullore është e lashtë sa vetë njerëzimi dhe veçanërisht gjatë kohës kur ishte e vështirë të gjendeshin barna sintetike, njerëzit mbështeteshin tek natyra. Por, vitet e fundit në vendin tonë jo pak herë janë denoncuar raste të personave që vetëquhen mjekë popullorë dhe mashtrojnë njerëzit. Doktor Dankshi thotë për Tirana Today se njerëzit duhet të jenë më të kujdesshëm ku zgjedhin të shkojnë, pasi janë të shumtë “sharlatanët” që kërkojnë të abuzojnë.
“Njerëzit duhet ta besojnë mjekësinë alternative bimore, sepse në radhë të parë duhet të besojnë natyrën, bimësinë dhe të gjejnë njeriun e duhur.
Mjekësia popullore e hershme dhe ajo alternative ndryshojnë disi nga njëra-tjetra. Mjekësia popullore e hershme është vetëm me përgatitje bimësh dhe zierje çajrash bimore. Kurse mjekësia alternative ka qendra farmaceutike dhe fabrika bimore të prodhimeve të ilaçeve tërësisht natyrale. Mirëpo si në shumë fusha të tjera edhe këtu ka shumë njerëz të papërgjegjshëm, sharlatanë që abuzojnë me sëmundjen e dikujt. Por, vetëm me shëndetin që nuk duhet abuzuar.”/ TIRANA TODAY
