Dje presidenti Meta bllokoi buxhetin e vitit 2022. Lëvizja e tij fut në kaos institucionet, pasi nëse buxheti nuk dekretohet nga Kreu i Shtetit, atëherë nuk mund të ketë as fonde për institucionet në vend.
Në datën 20 dhjetor mbahet seanca e fundit e Kuvendit, dhe mazhoranca nuk ka kohë të mjaftueshme për të shqyrtojë dekretin, dhe kështu do të duhet që ta shqyrtojë nga mesi i muajit janar i vitit 2022. Në arsyet e kthimit për rishqyrtim në Kuvend për buxhetin e vitit 2022, presidenti Ilir Meta e ka konsideruar atë si një plan financiar antisocial.
“Në tërësinë e tij, buxheti është një plan financiar antisocial. Ka mangësi shqetësuese të transparencës në lidhje me shpenzimet dhe politikat fiskale. Mungon mbështetja reale për sektorët e ekonomisë dhe në mënyrë të veçantë për bujqësinë.
Mungon mbështetja e nevojshme buxhetore për shtresat në nevojë për kurimin ndaj infeksionit Covid-19, të cilët trajtohen në shtëpi dhe jashtë sistemit spitalor”, arsyeton Meta në vendimin e tij.
“Buxheti i vitit 2022 nuk reflekton një politikë të kujdesit social, për të përmirësuar gjendjen sociale në tërësi, si dhe në veçanti të personave në kufijtë e varfërisë. Gjendja sociale në vitin 2020 dhe në vazhdim në vitin 2021, është përkeqësuar më tej për shkak të rritjes së shpenzimeve familjare për shëndetësinë, rritjes së çmimeve të produkteve ushqimore dhe jo ushqimore, të uljes reale të të ardhurave, etj.”, deklaron Meta.
Duke iu referuar argumenteve të presidentit Meta, buxheti paraqet problematikë shumë shqetësuese në lidhje me nivelin e borxhit publik.
“Buxheti i vitit 2022 reflekton rritje të kostos së borxhit publik, të shpenzimeve operative, të shpenzimeve për koncesionet me mbështetje buxhetore, si dhe një nivel të lartë të investimeve publike. Në periudhën 2000 -2021, produktiviteti i borxhit i vlerësuar si raport i zgjerimit të Produktit të Brendshëm Bruto kundrejt zgjerimit të stokut të borxhit është përkeqësuar. Qeveria nuk bën transparente efektivitetin e përdorimit të borxhit dhe ndikimin në rritjen ekonomike”, thotë presidenti.
Buxheti 2022 është miratuar në Kuvend me 77 vota pro dhe 46 kundër më 25 nëntor të këtij viti, dhe parashikon që të mblidhen 536.8 miliardë lekë dhe të shpenzohen 637.6 miliardë lekë. Buxheti i ri parashikon rritje të pagesës së papunësisë, dyfishimin e ndihmës ekonomike për 15 mijë familje në vend si dhe trefishimin e ndihmës për familjet në nevojë me 3 fëmijë. Po ashtu do të rriten pagat me 6% për bluzat e bardha dhe arsimtarët, rritje me 7% për pagat e Gardës së Republikës, si dhe rritje me 30% për personelin e forcave të armatosura. Sa i takon pagës minimale ajo do të arrij në 32 mijë lekë brenda 2022, ndërkohë që për pensionet do të ketë vetëm indeksim sa vlera e inflacionit si dhe do të jepet bonus 5 mijë lekë në fundvit.
