Mes kaosit dhe shpresës, si nisi vaksinimi masiv!

Midis entuziazmit dhe kaosit është hapur dje fushata masive për vaksinimin e të moshuarve.Të moshuar të cilët nga njëra anë ishin të gezuar për mbërritjen e vaksinës dhe bërjen e saj për keto grupmosha dhe nga ana tjetër radhët e gjat të pritjeve krijonin një situatë të pakëndshme qofte si rrezik potencial për virusin, por edhe për vështirësinë që hasin të moshuarit teksa qëndrojnë me orë të tëra ne radhë në pritje të vaksinës.

Përtej shfaqjes që tashmë është bërë një normë nga Kryeministri aktual Edi rama, në qëndrat shëndetësore që merren me procesin e vaksinimit situate paraqitet me të vërtetë kaotike.

 

Për t’u imunizuar nga COVID-19, dhjetëra syresh u përballën me potencialin e infektimit, duke pritur bashkë me një familjar shoqërues, për më shumë se një orë në radhë. Me shpresën se do t’i jepet fund pandemisë, moshat e treta u renditën si dikur në pritje se kur do t’u thirrej emri. Përpos kësaj panorame, ata ndjehen entuziastë dhe të sigurt, pavarësisht llojit të vaksinës që po u injektohet. “E kam pritur me padurim vaksinimin, megjithëse jo atë kineze. Por jemi bindur që duhet bërë”. Dy çadra me nga dhjetë pika vaksinimi secila zbardhën dje sheshin “Skënderbej” e do të vijojnë të qëndrojnë aty. Bashkë me ato në stadiumin “Air Albania”, këto janë dy qendrat më të mëdha në Tiranë për vaksinimin, përveç atyre në qendrat shëndetësore. Për mbarëvajtjen e procesit, në qendër u angazhuan mjekë e infermierë, edhe nga forcat e armatosura. Më shumë se sa injektimi, më tepër kohë është shpenzuar për leximin e formularit disafaqësh me të dhënat mjekësore dhe efektet anësore.

Pak metra larg sheshit ku kryheshin injektimet nën syrin e medias dhe Kryeministrit, në qendrat shëndetësore, situata shfaqet edhe më kaotike. Ndryshimi i orës dhe mosorganizimi i duhur nga ana e stafit ka shkaktuar një kaos të vërtetë, veçanërisht në orët e para të paradites. Për të mos humbur ditën e paracaktuar për vaksinim, të moshuar mbi 80 vjeç kanë rezistuar përtej orës së thirrur, e përtej lodhjes, shpesh edhe duke rrezikuar. “Normalisht, ky nuk është vend për t’u vaksinuar. Ne po e marrim më shumë virusin këtu. Vijnë e futen pa radhë. Jam 87 vjeçe dhe po pres”, shprehet një e moshuar në Qendrën Shëndetësore Nr.3 në kryeqytet, teksa ankohet se aty nuk ka rregull dhe nuk po respektohet distanca.

E njëjta panoramë ishte dje edhe në rrethe. Pasi u furnizuan dy ditë më parë me dozat e “Coronavax”, në disa qytete të mëdha të vendit nisi injektimi për të moshuarit mbi 80 vjeç. Ata ishin zgjuar herët për të kapur orarin e paracaktuar nga mjeku i familjes dhe ndenjën në radhë, në pritje të thirrjes së emrit duke u shprehur me entuziazëm se “ia hodhën”. “Nuk e ndjemë fare gjilpërën. Jemi shumë të kënaqur që na erdhi radha më në fund”. 19 qendra vaksinimi në qendër të qytetit të Korçës e deri te zonat më të largëta janë hapur e ngjashëm edhe në të tjera në vend që nga kjo e hënë hapin dyert për atë që autoritetet e quajnë vaksinim masiv.

Burimi:Panorama