Me dorën mbi Kushtetutë, Xhaçka dhe Peleshi betohen para Presidentit Meta

Ministrja e Jashtme, Olta Xhaçka dhe Ministri i Bujqësisë, Niko Peleshi janë betuar pasditen e kësaj të hëne para Presidentit të Republikës, Ilir Meta.

Pas ekzekutimit të himnit kombëtar, Ministrja Xhaçka dhe Ministri Peleshi u betuan me dorën mbi Kushtetutë para Kreut të Shtetit: “Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave”.

Presidenti Meta u dorëzoi dekretet përkatëse të emërimit Ministres Xhaçka dhe Ministrit Peleshi, duke u uruar suksese në detyrat e tyre të reja e të rëndësishme.

Në ceremoninë e betimit ishin të pranishëm Sekretari i Përgjithshëm i kryeministrisë, Engjëll Agaçi si dhe anëtarë të Kabinetit të Presidentit.

Kuvendi ka votuar sot për dekretet e Presidentit për ndryshimet e fundit në Qeveri. Dekreti  për shkarkimin e Xhaçkës nga pozicioni i Ministres së Mbrojtjes u miratua me 95 vota, ndërsa për emërimin e saj si ministre për Evropën dhe Punët e Jashtme kanë votuar pro 94 deputetë,  4 kundër dhe 1 abstenim.

Dekreti për shkarkimin nga detyra e ministrit të Jashtëm të Edi Ramës u miratua me 95 vota pro, ndërsa emërimi i Niko Peleshit si Ministër i Mbrojtjes me 94 vota pro, 3 kundër dhe 3 abstenim.