Në kuadër të masave për të parandaluar përhapjen e COVID-19, Drejtoresha e Përgjithshme e Shërbimit Social Shtetëror znj. Luneda Sufali ka njoftuar publikisht se punonjësit e institucioneve të përkujdesit shoqëror janë vetë-karantinuar.
Znj. Sufali bën me dije se një sërë masash të rrepta për parandalimin e përhapjes së infeksionit janë marrë në të gjitha institucionet e përkujdesit shoqëror për fëmijët pa kujdes prindëror, për personat me aftësi ndryshe si dhe të moshuarit e vetmuar.
Raportohet se punonjësit do të qëndrojnë të mbyllur së bashku me përfituesit e shërbimit për të paktën 14 ditë.
Drejtoresha e Përgjithshme e Shërbimit Social i bën thirrje qytetarëve që të qëndrojnë të sigurt, të kujdesen për veten dhe për të tjerët.
Reagimi i plotë i znj. Sufali: “Punonjësit e institucioneve të përkujdesit shoqëror janë vetë-karantinuar për të mbrojtur shëndetin e përfituesve.
Covid-19 prej ditësh ka mbërritur edhe në Shqipëri, ku në mënyrë të menjëhershme janë marrë masa për të frenuar përhapjen e tij.
Një sërë masash të rrepta për parandalimin e përhapjes së infeksionit janë marrë në të gjitha institucionet e përkujdesit shoqëror për fëmijët pa kujdes prindëror, për personat me aftësi ndryshe dhe të moshuarit e vetmuar.
Përveç respektimit rigoroz të rregullave të higjienës personale, prej datës 12 Mars 2020, nën ndjekjen e veçantë dhe Urdhrin e Drejtoreshës së Përgjithshme të Shërbimit Social Shtetëror znj. Luneda Sufali, një pjesë e stafit të 12 institucioneve të përkujdesit janë vetëkarantinuar për të mbrojtur shëndetin e fëmijëve, të moshuarve e personave me aftësi të kufizuara.
Punonjësit do të qëndrojnë të mbyllur së bashku me përfituesit e shërbimit për të paktën 14 ditë, me shpresën se situata deri atëherë do të kenë ndryshuar. Në karantinë aktualisht ndodhen stafet e shtëpive të fëmijës dhe foshnjës, qendrave të zhvillimit dhe shtëpive të të moshuarve.
Këto masa në dukje drastike do t’i shërbejnë mbajtjes nën kontroll të përhapjes së infeksionit. Qëndroni të sigurt, kujdesuni për veten dhe të tjerët”.
