Kryeministri Edi Rama ndodhet në qytetin e Fierit, në kuadër të turit “Bashkia që duam” , e ku deklaroi se nuk do të dorëzohet para kërkesave të opozitës së bashkuar.
Ndër të tjera, ai u shpreh se mos të shqetësohen aspak personat të cilët dërgojnë mesazhe për të mos u dorëzuar. Për sa i përket protestuesve në Fier, ai i quan “petritat e Saliut” që përfaqësojnë dëshpërimin e madh të “Saliut dhe çetës së tij”.
“100 petritat e Saliut atje te kthesa që përfaqësojnë dëshpërimin e madh të saliut dhe të çetës së tij plakë që tani ka mbetur aty ku i takon, rrugëve, rrugëve. Rrugët e lëna rrugëve ne i morëm trashëgim dhe pak nga pak po i sistemojmë. Siç i la rrugët rrugëve e nxori PD-në rrugëve. Ju them të gjithëve të mos shqetësohen më çojnë sms ‘mos u dorëzo’, kujt t’i dorëzohemi. Atyre atje tek kthesa? Që në kthesë janë e atje do jenë për sa kohë nuk ndahen nga ata që i kanë marrë peng. Peng i ka marrë koka që s’di ku i çon.
Çfarë bëmë ne, i morëm në qeveri dhe iu dhamë të gjitha ministritë e rëndësishme. Iu thamë merri të tëra, dhe i thashë nënshkruaj këtu Lulzim dhe kush fiton zgjedhjet i fiton. Fituam zgjedhjet, u lodh Luli, dhe fjeti gjumë të gjithë verës, asnjë punë në Kolegj, ua dhamë rrogën kot punonjësve pa asnjë punë”, u shpreh Rama nga Fieri.
