Kryesore

Lleshaj pohon se shpëtimi i Alvinit po përdoret politikisht


               Publikuar në : 10:26 - 08/11/19 B H

Ministri i Brendshëm, Sandër Lleshaj, ka folur ditën e sotme nga Roma në lidhje me  operacionin e shpëtimit të Alvin Berishës nga Siria.

Lleshaj ka falenderuar të gjithë ata që ndihmuan në zhvillimin e këtij operacioni. Sipas tij, operacioni është ndjekur drejtpërdrejtë nga kryeministri italian Giussepe Conte dhe kryeministri shqiptar Edi Rama.

Më tej, ministri i Brendshëm e pranoi se ngjarja në fjalë po përdoret politikisht. Ai shton se historia e 11-vjeçarit po përdoret për të përcjellë mesazhin që terrorizmi dhe ekstremizmi nuk kanë vend në shoqërinë tonë.

“Gjithçka erdhi pas takimit të dy kryeministrave Conte e Rama në Romë, operacioni u ndoq nga ata të dy drejtpërdrejt. Aspekti diplomatik përfshiu dy ambasadat në Romë dhe ambasadën italiane në Bejrut. Ka pasur një aspekt të rëndësishëm policor ku janë angazhuar policitë e dy vendeve dhe së fundmi por jo nga rëndësia ka qenë aspekti humanitar ku janë angazhuar Kryqi i Kuq ndërkombëtar dhe Gjysmëhëna e kuqe. Nuk dua të hyj në detaje të operacionit por kam ardhur për të shprehur mirënjohjen e qeverisë shqiptarë për të gjithë aktorët e përfshirë. Së pari, për autoritetet policore të Italisë e Shqipërisë, për presidentin e Kryqit të Kuq italian e Ndërkombëtar dhe presidentit të Gjysmëhënës së Kuqe Siriane. Po ashtu dua të përshëndes autoritetet diplomatike që u përfshinë në këtë operacion. Ishin autoritetet libaneze që mbështetën me gjithë kapacitetet e tyre operacionin në terren. Rasti ka marrë një vëmendje të madhe dhe natyrisht lind pyetja nëse po përdoret politikisht. Dhe unë them po! Po e përdorim politikisht për të dhënë disa mesazhe të rëndësishme që duhet të vlejnë si eksperiencë pas këtij operacioni. Alvin Berisha është një nga ato rastet që duhet të na tregojë se terrorizmi, ekstremizmi nuk duhet të ketë vend në shoqëritë tona”, tha ai.

Kthehu
WhatsApp Denonco ne TT