Drejtuesi i seancës së parë ceremoniale të Kuvendit të ri, Besnik Bare në hapje të sesionit parlamentar theksoi se deputetët duhet të vendosin interesat e vendit mbi ato personale.
Ai bëri apel që të lihen mënjanë konfliktet politike që deri më sot janë reflektuar edhe tek qytetarët duke shkaktuar një polarizim të tejskajshëm tek këta të fundit.
“Në këtë Kuvend kam pasur nderin të ndjek përshëndetjet e shumë personaliteteve, si ajo e Hillary Clinton, e cila theksoi se pavarësisht mospërputhjeve me kundërshtarin e saj në fushatën elektorale Barack Obama, të dy kanë punuar për interesat e vendit. Ndaj i uroj këtij parlamenti që të ndryshojë besimin që interesat e vendit të jenë mbi ato partiake dhe personale. Kjo duhet të jetë jo vetëm me fjalë por me vepra. Kjo kulturë konfliktuale është reflektuar edhe tek qytetarët. Ne duhet të sjellim modele dhe një kulturë të tjetër politike dhe kjo uroj që të kthehet në model të etikës sonë politike”, u shpreh Bare.
