Pasi Saimir Tahiri u bë ministër i Brendshëm, rrugët u mbushën me policë. Aksidentet nuk pësuan ulje në numër, por u tentua që të vihej rregull. Tashmë Tahiri është një emër i së shkuarës, jo pak i komentuar, e ndërsa një rregullore i paraprin pas marrjes së postit nga pasardhësi Lleshaj. Që në orët e para të ditës, ministri Lleshaj u sigurua të përçonte mesazhin për ndryshime radikale në kontrollin e qarkullimit rrugor.
Me anë të një shkrese drejtuar Drejtorit të Përgjithshëm të Policisë së Shtetit, ministri i Brendshëm, Sandër Lleshaj, kërkon ndalimin e praktikës së ashtuquajtur ‘postoblloqe policore’ në akset e vendit, si dhe heqjen e praktikës së dublimit të semaforëve me punonjës policie, në kryqëzimet e rrugëve urbane. Por duket se ky urdhër mbetet akoma në teori, pasi situata vijon të mbetet e njëjta siç ka qënë.
Ministri mjaft i shqetësuar për situatën me qarkullimin rrugor, kërkon ndërhyrje, e ndërsa nënvizon se prania e policisë në numër të tepruar, nuk sjell ndonjë vlerë të shtuar në rritjen e parametrave të sigurisë rrugore. Një ndër pikat që ai ka trajtuar është shmangia në maksimum e punonjësve të Policisë Rrugore, që dublojnë semaforët.
Sipas tij, kjo praktikë ndikon në edukim të gabuar të përdoruesve të rrugës, në raport me rregullat e qarkullimit rrugor. Por gazetari Armand Bajrami, pasi ka bërë një vëzhgim të thjeshtë në rrugët e Tiranës, ka vënë re se ky urdhër mbetet ende në letra.
