Kryeministri malazez: Nuk e njohim pavarësinë e Kosovës, është pjesë e Serbisë

Kryeministri i Malit të Zi, Zdravko Krivokapiç në një intervistë për gazetën serbe “Blic” ka folur për çështjen e Kosovës duke deklaruar se sikur ai të kishte qenë në krye të qeverisë malazeze në vitin 2008, shteti i tij kurrë nuk do ta kishte njohur pavarësinë e saj.

Kreu i qeverisë së Malit të Zi ka thënë se çështja e Kosovës, për një pjesë të banorëve të këtij shteti, është çështje emotive dhe se ata mendojnë se ajo është pjesë e patjetërsueshme e Serbisë, shkruan Vijesti.

“Kjo pjesë e njerëzve tanë do të mendojnë ashtu, pa marrë parasysh çfarë do të jetë në fund marrëveshja ndërmjet Beogradit dhe Prishtinës. Nëse do të kisha qenë unë kryeministri i Malit të Zi, në kohën kur Mali i Zi ende nuk e kishte njohur Kosovën, kurrë nuk do të isha pajtuar që ajo të ndodhte. Por gjithçka ka përfunduar para se të vij unë në qeveri edhe para kësaj qeverie ”, ka thënë Krivokapiç.

Ai u shpreh se nëse ata do të merrnin vendimin për tërheqjen e njohjes së pavarësisë së Kosovës, Qeveria do të binte në seancën e parë parlamentare.