Deputetja e Partisë së Lirisë, Monika Kryemadhi, ka reaguar me anë të një statusi në rrjetet sociale, pas urdhër arresteve të reja të lëshuara nga SPAK në lidhje me abuzimet përmes inceneratorit të Fierit. Kryemadhi në reagimin e saj thotë se drejtësia nuk duhet të veprojë me regji dhe favorizime klienteliste. Ndër të tjera, zbulon se SPAK ka kërkuar arrestimin e Armando Subashit, por që sipas Kryemadhit është ndaluar. Kryemadhi trumbeton me të madhe se SPAK duhet të godasë në shenjë për inceneratorët. Deputetja thotë se po monitorojnë çdo veprim të autoriteteve për inceneratorët, dhe do të bëjnë çdo gjë që të korruptuarit e qeverisë të njohin ligjin, ndërsa paratë dhe pronat publike t’i kthehen shqiptarëve.
“Përshëndes veprimet e sotme për inceneratorët. Treguan se faktet që kam bërë publike janë të pamohueshme. Por, drejtësia nuk duhet të veprojë me regji dhe favorizime klienteliste!
Burime të besueshme tregojnë se para pak muajsh SPAK ka kërkuar masë arresti për Armando Subashin dhe është frenuar. I njejti deformim po ndodh për hetimet e inceneratorit të Tiranës, për të shpëtuar Erion Veliajn dhe kokat e vërteta të aferës së inceneratorëve.
SPAK duhet të godasë në shenjë për inceneratorët, mos të drejtohet sipas sulmeve që vijnë nga kongresi i partisë.
Po monitorojmë çdo veprim të autoriteteve për inceneratorët dhe do të bëjmë çdo gjë që të korruptuarit e qeverisë të njohin ligjin, ndërsa paratë dhe pronat publike t’i kthehen shqiptarëve”.
