Ish-kongresmeni republikan nga Nju Jorku, George Santos, është dënuar me më shumë se shtatë vjet burg, pas shpalljes fajtor për një sërë akuzash federale, përfshirë vjedhje të identitetit, mashtrim financiar dhe keqpërdorim të fondeve të fushatës.
36-vjeçari, i përjashtuar më herët nga Kongresi, u deklarua fajtor në gusht 2024. Prokurorët kërkuan një dënim prej 87 muajsh, ndërsa mbrojtja kërkoi dënimin minimal prej dy vitesh. Gjykata vendosi një mesatar mes kërkesave, duke shënuar fundin e një prej rënieve më të bujshme politike të viteve të fundit në SHBA.
Sipas akuzës, Santos kishte përdorur fonde të fushatës për shpenzime personale, përfshirë pagesa për Botox dhe abonime në OnlyFans, si dhe kishte aplikuar ilegalisht për përfitime papunësie. Ai gjithashtu kishte gënjyer FEC-në dhe Kongresin për të ardhurat dhe pasuritë e tij. Një nga mashtrimet më të theksuara ishte ngarkimi i më shumë se 44,000 dollarëve në kartat e kreditit të mbështetësve të tij, pa dijeninë e tyre.
Përveç burgut, Santos është urdhëruar të kthejë 374,000 dollarë si kompensim për dëmet e shkaktuara. Ai ka tentuar të grumbullojë para përmes platformës Cameo, duke ofruar video për fansat e tij.
Rënia e tij nisi në vitin 2022 pas një hetimi të New York Times, që zbuloi se Santos kishte gënjyer për diplomën, përvojën në kompani si Citigroup dhe Goldman Sachs, madje dhe për historinë e familjes së tij. Më pas, akuzat u shtuan duke përfshirë edhe mashtrime më të vogla si ai për një mbledhje fondesh për një qen të sëmurë apo deklarata të rreme për sulmët e 11 shtatorit.
Në vitin 2023, ai u bë anëtari i parë i Kongresit që përjashtohet në më shumë se 20 vjet, pas një raporti shkatërrues nga paneli i etikës së Dhomës.
Santos, që kishte fituar zgjedhjet në një distrikt të Long Island dhe Queens në 2022, mbetet një mbështetës i flaktë i Donald Trump. Ai deklaroi për New York Times:
“Nëse presidenti mendon se unë jam i denjë për çdo nivel mëshire, ai mund të vazhdojë dhe ta bëjë atë, por për mua të kërkoj falje do të thotë të mohoj përgjegjësinë.”
