Aktualitet

 Kanadaja konfirmon pjesëmarrjen në Konferencën e Donatorëve (VIDEO)


               Publikuar në : 14:17 - 14/02/20 Gentjan Progni

Ditën e sotme, kryeministri Rama ka zhvilluar një takim me kryeministrin e Kanadasë Justin Trudeau në Mynih të Gjermanisë, si pjesë e punimeve të Konferencës së Sigurisë.

Gjatë takimit, kryeministri kanadez ka shprehur angazhimin dhe pjesëmarrjen e Kanadasë në Konferencën e Donatorëve që zhvillohet në 17 shkurt për të prekurit nga tërmeti i 26 nëntorit.

“Kënaqësi e vërtetë të ulem sërish me mikun tim, Edi Rama nga Shqipëria. Më jep mundësinë së pari, të shpreh edhe njëherë ngushëllimet e mia për tërmetin e tmerrshëm për të cilin folëm kur u takuam në NATO. Kanadaja është angazhuar për të marrë pjesë edhe në Konferencën e Rindërtimit, në Shkurt. Kemi punuar shumë mirë bashkë në misionet e NATO-s. Shqiptarët po kryejnë shërbimin përkrah  Kanadasë në Letoni për mision “Enhanced Forward Presence” dhe është kënaqësi të vazhdojmë të shkëmbejmë dhe të kemi një bashkëpunim kaq të mirë me ju ndërsa ecim përpara“, tha Trudeau.

Rama ka shprehur mirënjohje ndaj kryeministrit kanadez dhe ka folur për forcimin e mëtejshëm të marrëdhënieve ndërmjet dy palëve.

“Jam shumë mirënjohës dhe e vlerësoj shumë takimin me ju në çdo rast. Ju e dini që keni një ndikim shumë të madh te shumë nga homologët tuaj. Në të njëjtën kohë e dini që jeni edhe Kryeministër i shumë shqiptarëve që jetojnë në Kanada, punojnë shumë dhe kontribuojnë për vendin tuaj, por gjithashtu marrin shumë njohuri dhe të mira nga vendi juaj për familjet e tyre. Do të doja t’ju shpreh edhe mirënjohjen që treguat ndjeshmëri për ato që ndodhën kohët e fundit. Mirënjohës që do të jeni i pranishëm në konferencë. Duam t’i forcojmë marrëdhëniet. E di që jemi larg, por në një farë mënyre ndihemi shumë të afërt me vendin tuaj dhe të gjithë ju. Prandaj faleminderit për kohën dhe faleminderit që u ulët nga ana e flamurit shqiptar.”, tha Rama.

Gjermani, Mynih –Takim me Kryeministrin kanadez, Justin Trudeau, mbi Rindërtimin dhe Konferencën e Donatorëve, ku Kanadaja ka treguar gatishmërinë për të qenë pjesë, si edhe marrëdhëniet dypalëshe?????

Gepostet von Edi Rama am Freitag, 14. Februar 2020


Kthehu
WhatsApp Denonco ne TT