Zbardhen detaje tjera nga ngjarja tronditëse që ndodhi dje në Durrës, ku një burrë goditi me një metër metalik gruan e tij duke e lënë të vdekur në vend.
Rruzhdi Tasuni, 63 vjeç, akuzohet se vrau Hajdie Tasunin, 59 vjeçe, nënë e 3 fëmijëve, në dyqanin e tyre pas një konflikti të ashpër mes tyre. Mësohet se ka qenë vetë Rruzhdiu ai që ka lajmëruar policinë, pas asaj që kishte ndodhur. Pas aktit makabër, ai ka mbyllur qepenin e dyqanit dhe ka shkuar për të blerë një paketë cigare.
Më pas, kur është kthyer ka hyrë në farmacinë pranë biznesit dhe i ka treguar njerëzve të pranishëm se kishte vrarë gruan. Pas kësaj, Rruzhdiu është ulur në trotuar dhe ka pritur policinë që të vinte dhe ta arrestonte. Gjatë momentit që po shoqërohej në polici, autori është pyetur se pse e kishte vrarë gruan.
“Ma solli shpirtin aty ku nuk mban më. Kam 30 vjet që e duroj dhe e vrava”, mësohet të jetë përgjigjur ai.
Ndërkohë, në deklaratën e tij në polici 63-vjeçari ka treguar se konflikti ka nisur pasi bashkëshortja i kishte kërkuar llogari pse ishte vonuar dhe kishte pirë.
“Jam shumë i tronditur, mbaj mend që më tha pse u vonove, pse ke pirë. Kaq mbaj mend. Aty llaf pas llafi situata më doli jashtë kontrollit dhe e qëllova me metrin metalik, me cilin matim materialet që shesim. Nuk doja ta vrisja. Jam shumë i penduar dhe më vjen shumë keq”, ka thënë ai.