Jep dorëheqjen kryetarja e Gjykatës në Durrës, për çfarë u akuzua pas 30 qershorit

Dorëhiqet nga posti i kryetares së Gjykatës së Durrësit, Joana Qeleshi, e cila e mbante këtë pozicion që nga viti 2013.

Mësohet se Qeleshi ka deklaruar se largimi i saj vjen si pasojë e arsyeve personale. Joana Qeleshi nuk është një emër i panjohur, pasi emri i saj u lakua kur iu dha mandati nga gjykata kryetares së re të bashkisë së Durrësit, Valbona Sakos.

Kujtojmë se Gjykata e Durrësit kishte marrë një vendim për mos njohur mandatin e Sakos, ndërsa dy ditë më pas e njëjta çështje u gjykua në të njëjtën Gjykatë ku drejtonte Qeleshi, duke i dhënë mandatin Sakos. Gjithashtu emri i saj është diskutuar edhe në kohën kur Ministria e Drejtësisë drejtohej nga Ylli Manjani.

Ish-ministri kërkoi një hetim të thellë dhe shkarkim të gjyqtares së Durrësit, që i ktheu pronën familjes Seçuni, aty ku kompania Omnix e Faadi Mitrit, që u largua me barelë nga vendi ynë, do ngrinte resortin. Vetë gjyqtarja atëherë reagoi për mediat, duke thënë se “Kam folur përmes vendimit”.