Real Madrid flitet se është hedhur në sulm për Neymar dhe se ai mund të bashkohet me madrilenët gjatë kësaj merkatoje. Por interesimi i madrilenëve duket se ka “tërbuar” Barcelonën e cila ka hyrë në garë për të rikthyer brazilianin në “Camp Nou”.
E përditshmja katalanase ‘Mundo Deportivo’ ka dalë sot me këtë lajm të bujshëm, ku raporton se klubi blaugrana do të tentojë këtë verë të rikthejë në Camp Nou “djalin planprishës”, i cili në 2017 braktisi Barcelonën për Parisin.
Por PSG nuk ka ndërmen që ta lëshojë aq lehtë futbollistin më të shtrenjtë në histori, duke pasur në dorë kontratën që zgjat deri në 2022, por nga ana tjetër dëshira e lojtarit duket se është të kthehet në Spanjë.
Një arsye e fortë që mund ta bindë PSG të shesë Neymarin është nevoja për lojtarë në repartet e tjera dhe Barcelona këtu mund të përfitojë, sepse është gati t’i ofrojë Ivan Rakitic, Philippe Coutinho dhe Ousmane Dembelé, ky i fundit i zbuluar nga Thomas Tuchel në Dortmund.
Të tre lojtarët janë shumë të vlerësuar në Paris dhe ndoshta një shkëmbim lojtarësh do të lumturonte të gjithë, përfshirë Kylian Mbappe, i cili para pak ditësh lëshoi një deklaratë të fortë: “Erdhi koha të marr më shumë përgjegjësi mbi vete, në Paris apo gjetkë”.
