Në tremujorin e parë të 2017-ës, numri i shfaqjeve kulturore ka shënuar një rënie me 25,5% krahasuar me tremujorin e parë të 2016-ës.
Gjithashtu, rënie ka pësuar edhe numri i spektatorëve, i cili gjatë tremujorit të parë të këtij viti është 43.000, duke pësuar një rënie prej 14,3% krahasuar me të njëjtën periudhë të 2016-ës.
Raporti me të dhënat përkatëse është publikuar nga INSTAT, ndërsa vihet re një rritje e numrit të spektatorëve për shfaqje.
Kështu, pjesëmarrja mesatare në tremujorin e parë 2017 është 203 spektatorë/vizitorë për shfaqje dhe ka pësuar rritje me 15,1 %, krahasuar me tremujorin e parë 2016.
Teatri Kombëtar Eksperimental: Numri më i lartë i shfaqjeve, rritet numri i spektatorëve
Ndërkohë, institucioni që ka realizuar numrin më të lartë të shfaqjeve kulturore është Teatri Kombëtar Eksperimental (TKE), me 102 shfaqje/ekspozita në tremujorin e parë 2017. Në tremujorin e parë 2017, numri i spektatorëve është 13.647, duke shënuar rritje 9,8 %, krahasuar me tremujorin e parë 2016.
Qendra Kombëtare e Kulturës për Fëmijë: Më pak shfaqje, por më shumë spektatorë (tremujori i parë i 2017, krahasuar me të njëjtën periudhë 2016)
Numri i shfaqjeve kulturore të realizuara nga Qendra Kombëtare e Kulturës për Fëmijë në tremujorin e parë 2017 është 53 shfaqje/ekspozita, duke shënuar ulje me 8,6 %, krahasuar me tremujorin e parë 2016. Në tremujorin e parë 2017, numri i spektatorëve është 7.918 duke shënuar rritje me 38,3 %, krahasuar me të njëjtën periudhë 2016. Numri mesatar i spektatorëve në tremujorin e parë 2017 është 149 spektatorë/vizitorë për shfaqje duke pësuar rritje me 51,3 %, në krahasim me të njëjtën periudhë të vitit të mëparshëm.
Biblioteka Kombëtare: Më shumë botime, por më pak frekuentues (tremujori i parë i 2017, krahasuar me të njëjtën periudhë 2016)
Numri i frekuentuesve të Bibliotekës Kombëtare në tremujorin e parë 2017 është 35.707, duke shënuar rënie me 31,3 %, krahasuar me tremujorin e parë 2016. Në tremujorin e parë 2017, në Bibliotekën Kombëtare janë afishuar 4.874 botime, 11,6 % më shumë në krahasim me të njëjtën periudhë të vitit të kaluar. Nga këto botime 927 ishin tituj të rinj dhe 3.947 ekzemplarë të rinj.
