I publikoi videon me armë, Veliu takon dhe i kërkon ndjesë publike nënës së adoleshentit

Drejtori i Përgjithshëm i Policisë së Shtetit, Ardi Veliu ka zhvilluar ditën e sotme një takim me nënën e adoleshentit të dhunuar nga disa efektivë, Zaida Çobon.

Përmes një njoftimi për mediat, Policia e Shtetit njofton se Veliu i ka kërkuar ndjesë personalisht Çobos për komentet e bëra ndaj saj.

Në fjalën e tij, Veliu shprehet se komentet e tij ndaj nënës së adoleshentit nuk ishin për të justifikuar veprimin e efektivit të policisë.

Kujtojmë se në një mbledhje online, Veliu tregoi një video të nënës së adoleshentit me një armë në dorë, duke e akuzuar lidhur me shembullin që i jepte djalit të saj. Por siç doli më vonë, videoja ishte pjesë e një skene filmi në të cilin Zaida Çobo kishte luajtur.

Postimi i Policisë së Shtetit:

Paraditen e sotme, Drejtori i Përgjithshëm i Policisë së Shtetit Ardi Veliu, së bashku me Zv.drejtoren e Përgjithshme Aida Hajnaj, pritën e zhvilluan një takim me znj. Zaida Çobo.

“Sot u takuam me zonjën Zaida Çobo, e cila me të drejtë u ndje e lënduar nga komenti im që mori edhe shumë kritika publike.

Dëshiroja që ndjesën time publike t’ia bëja zonjës personalisht dhe më vjen mirë për mirëkuptimin e saj.

Përfitoj nga rasti ta përsëris edhe njëherë që jam i keqardhur për komentin tim dhe shpresoj që të jetë kuptuar nga të gjithë që ato fjalë nuk kishin qëllim fare të justifikonin policin (i cili është pezulluar menjëherë pas ngjarjes).

Po ashtu nuk më ka shkuar kurrë mendja të lëndoj zonjën apo familjen e saj me atë koment. Ndjesë edhe njëherë!” – u shpreh Drejtor Veliu pas bisedës.