45.5 kg heroinë është sekuestruar dje në Portin e Durrësit, ndërsa janë vënë në pranga dy shtetas. Operacioni në fjalë është zhvilluar nga Task-Forca permanente që vepron në Portin e Durrësit, e përbërë nga Policia Kufitare, strukturat hetimore të Drejtorisë Vendore të Policisë Durrës dhe autoritetet doganore të Portit.
Sasia e drogës u kap në një kamion të ngarkuar me krom, me destinacion Portin e Barit në Itali.
Si rezultat i kontrolleve intensive dhe informacioneve të marra në rrugë operative nga strukturat hetimore, për një sasi lëndë narkotike që do trafikohej drejt Italisë, është organizuar dhe finalizuar operacioni policor i koduar “Portëz”.
Në sajë të këtij operacioni të koduar u bë arrestimi në flagrancë i shtetasve Olgert Duda, 36 vjeç, banues në Fier dhe Arian Çerma, 45 vjeç, banues në Durrës. Dyshohet se pronari i automjetit, Arian Çerma, ishte ai që kishte lidhje me grupin e trafikut të heroinës në Itali.
Pakot me mbishkrimin “banane”
Kamioni i tipit “Sacania” u kontrollua imtësisht në dalje, në vijën e dytë, pas informacioneve të grumbulluara nga policia. Sasia e heroinës, e ndarë në 43 pako të mbështjella me natriban, u gjet e fshehur në kabinën e kamionit.
Lënda narkotike ishte e ndarë për tre marrës të ndryshëm, ku pakot ishin bërë me shenjë, një pjesë e të cilave kishin mbishkrimin “banane”.
Heroina me tre logo të ndryshme
45.5 kg heroinë e kapur në një kamion në Portin e Durrësit, ka qenë e destinuar për tre marrës të ndryshëm. Për identifikimin e tyre janë përdorur një shirit i zi, një shirit i bardhë dhe një me mbishkrimin banane.
Nga paketimi, sasia e drogës nuk kishte një ndarje të barabartë në kg, ku 15 pako kishin mbishkrimin banane, 7 me kryq të bardhë dhe 21 me shirit të zi.
Droga do të të dërgohej në Bari të Italisë, ndërsa të arrestuarit janë shprehur se nuk kanë dijeni për të.
