Analisti Andi Bushati, i ftuar në emisionin “Të Paekspozuarit”, ka komentuar platformën që propozoi opozita ditën e sotme, për detyrat e qeverisë tranzitore.
Bushati tha se kjo platformë identifikon problemet, por nuk ofron zgjidhje, ndaj ngjan me një marrëveshje të dytë si ajo e 17 majit 2017.
Bushati tha se opozita nuk ka goditur sistemin dhe se një qeveri tranzitore me mandat të shkurtër e ka të pamundur ta bëjë një gjë të tillë.
“Nëse do të isha sot Edi Rama, do thosha dakord pranohet platforma juaj, bëjmë qeverinë teknike, hyjmë në zgjedhje. Do të bëhej një marrëveshje si e 17 majit dhe Rama do të fitonte thellë.
Ato pika qëndrojnë por nuk zgjidhin problemin e madh që kemi me zgjedhjet. Vërtet zgjedhjet mund të çalojnë se ndryshohen listat, se blihen disa votat, por pa gjetur burimin nga blihen votat, pa gjetur gjithë sistemin propagandistik mediatik, që i shërben Ramës, të gjitha ato bëhen nul.
Një qeveri tranzitore me afat të shkurtër, në asnjë mënyrë nuk mund të zgjidhë problemet e shoqërisë shqiptare dhe zgjedhjet. Po them të gjithë ato para që hidhen në Tiranë për PPP, ndërtime dhe koncesion prapë aty do shkojnë.
Kemi një sistem të dënuar të jetë i lidhur me ushqyesin e tij, Edi Rama. Nëse do krijonim qeveri tranzitore me afat të shkurtër dhe ato 10 pika, nuk e kemi zgjidhur problemin dhe rrezikojmë një 17 maj të dytë. Opozita ka identifikuar drejt problemet, por ka dështuar të japë zgjidhjet”.
