Grabitje në 60 sekonda/Minorenët bëjnë namin, policia merret me gjobat

Në kohën kur Policia e Shtetit ka dalë në terren e merret me personat të cilët nuk janë të pajisur me maskat anti-Covid, nga ana tjetër hajdutët bëjnë namin me grabitjet. Grabitësve minorenë u duhet më pak se një minutë, për të realizuar planin e tyre.

Të maskuar me kapuç dhe me veshje sportive, e sigurisht me maska anti-COVID, të miturit shfaqen në kamerat e lokalit dhe drejtohen tek arka ku ndodhet xhiroja ditore.

Edhe pse në lokal bie alarmi, të miturit vazhdojnë pa asnjë problem kontrollin e tyre për sende me vlerë. Kjo vjedhje ka ndodhur përgjatë muajit nëntor në qendër të kryeqytetit, në rrugën e Barrikadave.

Më 14 nëntor ata kanë bastisur edhe dy biznese të tjera, siç dhe shihet në këtë video, teksa të dielën në orën 20:00 ata futen në një tjetër bar kafe. Report Tv ka mësuar se policia e Tiranës dhe komisariati nr.3 tashmë i ka identifikuar autorët. Por ata rezultojnë minorenë nën 15 vjeç, ç’ka ka bërë që policia të jetë e pafuqishme pasi ‘arresti me burg’ ndaj tyre është rrëzuar nga prokuroria dhe gjykata.