Fehmi Vata, 73 vjeç vendosi të punojë disa orë shtesë si roje për të fituar disa të ardhura më shumë. Ndaj kur ra edhe tërmeti fatal mëngjesin e 26 nëntorit, ai nuk ishte në shtëpi.
Ai nxitoi dhe vrapoi disa kilometra për të shkuar në shtëpinë e tij, të gjejë gruan, dy nipërit dhe nusen e djalit. Të cilët ishin të ngecur në rrënojat e një pallati pesë katësh në Thumanë.
Nipi 10-vjeçar i Fehmiut ishte një nga të mbijetuarit, por bashkëshortja e tij nuk ishte me fat. Ajo ndërroi jetë teksa mbante nipin në krahë, në përpjekje për ta shpëtuar. Ndërsa nusja e djalit po ashtu shpëtoi, por mori palgë të rënda dhe u dërgua për në spital.
“Gruaja ime thoshte gjithmonë se do të vdiste për nipërit dhe mbesat e saj. Dhe duket sikur ajo këtë gjë bëri,” tha Vata. I cili qëndron i ulur në një bllok betoni para një shiriti të kuq të vendosur nga policia, për të mbajtur larg banorët dhe mediat nga mbetjet e rrënuara.
Disa metra më poshtë, forcat operacionale shqiptare dhe greke po gërmonin për më shumë të mbijetuar. Nipi tjetër i tij, 7 vjeçar, mbeti i ngecur në gërmadha. Me shumë mundësi poshtë shkallëve, ku ai fshihej zakonisht, rrëfen 73-vjeçari. Rolejt Vata, mbeti nën rrënoja në Thumanë, ndërsa u gjet i pajetë në orën 00:30 të 28 nëntorit, dy ditë pas tërmetit.
“Jam i trishtuar sepse nuk mund të bëj dot asgjë për nipin tim. E vetmja gjë është të lutem,” thotë ai teksa nis të lotojë dhe trupi i dridhet nga pikëllimi.
“Përse Zoti nuk më mori mua?”
Ai tha se kishte folur me bashkëshorten e tij në telefon pas tërmetit të parë. Por, apartamenti i tyre u shkatërrua pas goditjes fatale me magnitudë 6.4.
Familja Vata është si shumë familje të tjera në Thumanë, në kushte shumë të vështira ekonomike. Banorët jetojnë kryesisht me punë bujqësie dhe çfarë i sjellin të afërmit që jetojnë në vende europiane.
Para tërmetit, djali i 73-vjeçarit shkoi në Greqi për të punuar për tre muaj. Maksimumi që ai mund të qëndrojë pa leje qëndrimi. Duke lënë pas gruan dhe dy fëmijët, të jetonin me prindërit e tij.
Djali tjetër i Fehmiut është me aftësi të kufizuara dhe i mbijetoi natës tragjike vetëm sepse po qëndronte me motrën e tij në një qytet tjetër.
“Gruaja ime ishte shtylla e shtëpisë. Ajo punonte gjithë ditën në bujqësi. Mund të kem pasur fatin të mbijetoj sepse isha roje sigurie, por për çfarë më duhet jeta ime pas kësaj që më ndodhi?”/ Burimi: Reuters Përshtati: TIRANA TODAY