Skënderbeut i shtohet një tjetër hall. I madh madje, shumë i madh… Pas konfirmimit të dënimit 10-vjeçar në KAS, “Panorama” raporton se FIFA ka nisur një shkresë ditët e fundit në Federatën Shqiptare të Futbollit, në të cilën njofton se Skënderbeu është i detyruar ta paguajë gjobën 1 milion euro para se të nisë sezoni.
Në të kundërt, edicionin e ri korçarët do ta nisin me -6 pikë.
Më keq se kaq nuk ka ku të shkojë për bardhekuqtë, që tani u duhet të bëjnë llogari të tjera për sezonin e ardhshëm. Pse FIFA dhe jo UEFA? Sepse UEFA ia ka bërë të qartë më parë Skënderbeut se duhet të paguajë gjobën para se të nisë sezoni, por zyrtarët e klubit i janë drejtuar më pas FIFA-s nëse mund të shtyhet afati për disa muaj apo jo. Kjo e fundit i ka kthyer përgjigje se duhet të zbatojë udhëzimet dhe kërkesat që vijnë nga UEFA.
SITUATA
Drejtuesit e Skënderbeut kanë dëshirë që betejën me UEFA-n pas dënimit me 10 vite mospjesëmarrje në Evropë dhe gjobës 1 milion euro për manipulime ndeshjesh ta vazhdojnë edhe në Gjykatën Federale të Zvicrës. Veçse, për ta bërë këtë, ata duhet të vazhdojnë të funksionojnë ende si klub profesionist. E thënë ndryshe, për aq kohë sa dosja “Skënderbeu” do të jetë në zyrat e Gjykatës Federale, klubi nuk mund të shkrihet. Kjo e komplikon akoma më shumë situatën, sepse tani Ardjan Takaj vendoset mes tri zjarreve: 1) shpenzimet për Gjykatën Federale; 2) shpenzimet për të mbajtur një ekip modest në Superiore; 3) detyrimi për të shlyer patjetër gjobën para se të fillojë sezoni. Ka shumë pak shanse që Takaj t’ia dalë mbanë duke i përballuar të tria këto “fatura”.
PLANI I RI
Prej kohësh po artikulohet në korridoret e FSHF-së dënimi i mundshëm i Skënderbeut dhe zbritja e një ose dy kategorive më poshtë. Motivi zyrtar është i padiskutueshëm: humbe edhe në shkallën e fundit gjyqin sportiv me UEFA-n dhe rrjedhimisht konsiderohesh fajtor për trukimet. Në këtë mënyrë, klubi zbret një ose dy kategori më poshtë, por vazhdon të funksionojë juridikisht, çka nuk do ta pengonte procesin në Gjykatën Federale. Vendimi i kësaj të fundit pritet të jepet në qershor të vitit 2020. Deri atëherë, edhe nëse do të mbërrijnë nga FIFA herë pas here urdhra për heqje pikësh apo penalitete të tjera, klubi do të mund të siguronte kohë deri në përgjigjen e Gjykatës Federale.
