Admirali britanik Lord West deklaroi se anijet e Marinës Mbretërore kanë gjetur një mënyrë shumë efikase për të zbuluar më shumë rreth armatimeve ruse.
Nëpërmjet “incidenteve” që shkaktojnë avionët rusë në detin e Zi, Marina Mbretërore ka mundësi që të mbledhë të dhëna kryesore për avionët rusë të luftës.
Studimet e Marinës Mbretërore për këta avionë do t’i lejojë anijet luftarake britanike që të qëllojnë avionët rusë nëse ata tentojnë të sulmojnë.
E përditshmja britanike “Daily Star”, duke cituar admiralin West shpjegoi se incidentet janë vërtetë “të dobishme” pasi lejojnë ekuipazhin të gjejë modelin e avionëve dhe sistemin e armatimit të rusëve.
Deklaratat e admiralit erdhën pas incidentit të javës së kaluar kur anija e marinës britanike “HMS Duncan” u provokua nga 17 avionë rusë në Detin e Zi.
Avionët rusë fluturuan drejt anijes dhe nuk iu përgjigjën thirrjeve me radio të anijes “HMS Duncan” për të mbajtur distancën e tyre. TIRANA TODAY
