Kryesore

“Fundjavë Ndryshe” vlerësohet “Nderi i Qarkut” Tiranë

               Publikuar në : 17:20 - 18/05/19 S.N

Këshilli i Qarkut të Tiranës vlerësoi Fondacionin “Fundjavë Ndryshe” dhe drejtuesin e saj Arbër Hajdarin me titullin “Nderi i Qarkut”. Për kontributin e çmuar në ndihmë të njerëzve në nevojë dhe gjithë shoqërisë si shembull frymëzimi për të rinjtë vullnetarë. Model i vlerave më të larta të humanizmit dhe përkushtimit.

Çmimi u dha nga kryetari i Qarkut dhe Këshillit Bashkiak të Tiranës, Aldrin Dalipi, i cili çmoi punën që Fondacioni ka kryer në ndihmë të njerëzve në nevojë në Tiranë e gjithë Shqipërinë.

“Ke bërë shumë njerëz të buzëqeshin në varfërinë e tyre dhe në hallet e problemet që ata kanë. E që shpesh herë ata që merren me politikë i harrojmë. Mesazhi yt është një mesazh shumë i fortë për Tiranën dhe për gjithë Shqipërinë. Shpesh herë na bën dhe kokë ulur për të kaluarën, sepse është një mesazh i fortë që shumë politika që ne bëjmë duhet t’i nisim në aspektin social. Duhet t’i nisim pikërisht nga ata njerëz që janë në varfëri.”

Ndërkohë drejtuesi i “Fundjavë Ndryshe” në fjalën e tij u shpreh se e gjithë suksesi i Fondacionit lidhet me bashkimin e mijëra shqiptarëve për të ndihmuar njerëzit në nevojë.

“Unë mendoj se arsyeja që “Fundjava” u ngrit kaq lartë në kaq pak kohë ishte sinqeriteti i një grupi shumë të madh njerëzish. Të cilët nuk e pranonin dot realitetin e të parit të fëmijëve në atë lloj mënyrë që i kemi gjetur. Dhe ishte forca e rinisë shqiptare, por jo vetëm. Edhe e  466 mijë njerëzve brenda dhe jashtë vendit që kanë besuar dhe janë bashkuar me Fondacionin “Fundjavë Ndryshe”.”

Hajdari foli edhe për ndërtimin e qendrës më të madhe në Ballkan, Qendra e Solidaritetit, ku ndër të tjera do të ketë qendër rehabilitimi, magazina për donacionet nga shoqëria, si edhe shkollë profesionale. Për të cilën drejtuesi i “Fundjavë Ndryshe” u shpreh se kanë filluar të studiojnë zanatet për të cilat Shqipëria ka nevojë, me qëllim implementimin në shkollën profesionale.

“Projekti po ecën me një intensitet të madh dhe besoj se 80% e tij do të jetë gati më shpejt se dy vite. Ndërkohë ne jemi duke bërë dhe një studim për çdo zanat që do të jetë pjesë e shkollës profesionale. Gjithashtu do të ketë dhe certifikime ndërkombëtare të fushave të ndryshme.”

Ndër të tjera ai lajmëroi edhe shtrirjen e “Fundjavë Ndryshe” edhe në vendet fqinje, kudo ku ka shqiptarë që janë në nevojë për ndihmë.

““Fundjava Ndryshe” do të jetë shumë shpejt në të gjithë Ballkanin, aty ku ka shqiptarë. Do të jetë në Maqedoni, në Kosovë, në Malin e Zi. Për të gjithë zërat që mund të kenë komentuar se përse “Fundjava” nuk ka shkuar më shpejt në këto vende fqinje ka një përgjigje. Shqipëria është vendi më keq se vendet fqinje, këtu është fukarallëku më i madh.”

Në ceremoninë e mbajtur në ambientet e Muzeut Kombëtarë morën pjesë vullnetarë, si edhe disa prej figurave të shquara të shoqërisë sonë. Aktori i mirënjohur Bujar Asqeriu me fjalë emocionuese i tërhoqi vëmendjen politikës dhe institucioneve të jenë më të përgjegjshme për gjendjen e popullit.

“Atë që nuk e bën politika, shteti, institucionet që paguhen e kanë fonde për të ngritur nivelin e jetesës së njerëzve. Që i lënë pa punë, nëpër kasolle, të lypin; këtë e bën ky djalë. Është një shembull i madh fisnikërie. Politika të jetë modeste dhe të mësojë nga djemtë dhe vajzat e mençura të Shqipërisë. Sepse vetëm kështu mund të ecim neve.”/ TIRANA TODAY

Kthehu
WhatsApp Denonco ne TT