Një 49-vjeçar është proceduar penalisht në Kakavijë, për shkak të mos deklarimit të të hollave në kufi. Shtetasi me inicialet N.T., i cili po hynte në Shqipëri nëpërmjet pikës kufitare të Kakavijës, është ndaluar nga policia për kontroll të mëtejshëm në mjetin e tij tip furgon. Policia e Kakavijës ka sekuestruar mbi 94 mijë paund, ndërsa ka proceduar 49-vjeçarin i cili ishte edhe poseduesi i shumës së padeklaruar.
Gjatë kontrollit të ushtruar në automjet policia gjeti të fshehur 86810 paund, ndërsa në një çantë dore gjetën dhe 7400 paund, të cilat ky shtetas nuk i kishte deklaruar. Shuma e parave u sekuestrua në cilësinë e provës materiale.
“Në përfundim të veprimeve të para të kryera nga specialistët e Seksionit për Hetimin e Krimit Ekonomik e Financiar në DVP Gjirokastër, drejtuesi i furgonit, shtetasi N. T. u procedua penalisht për veprat penale “Mosdeklarimi i të hollave dhe sendeve me vlerë në kufi” dhe “Pastrimi i produkteve të veprës penale ose veprimtarisë kriminale”.
