Media e njohur britanike u ka bërë jehonë gangsterëve shqiptarë, të cilët jetojnë në Londër.
Daily Express, shkruan se gangsterët shqiptarë me seli në Londër postojnë fotografi me armë, tufa me para dhe makina të shtrenjta. Sipas saj këto “dhurata”, ata i kanë fituar nga shitja e kokainës.
Media ka sjelle rastin e anëtarëve të bandës famëkeqe të ashtuquajtur “Hellbanianz”. Ajo shkruan se anëtarët e kësaj bande bëjnë një jetë luksi edhe pse janë pas hekurave.
Banda “Hellbanianz” me bazë në Barking, në lindje të Londrës, është e njohur si një nga bandat që ka lidhje me mafien në atdheun e saj.
Kjo bandë e merr drogën drejtpërdrejt nga anëtarët e saj në Amerikën Jugore. Besohet se bandat si “Hellbanianz”, kanë nën kontroll territore ku shiten lëndë narkotike e cilësisë së lartë.
Këto banda madje e ruajnë territorin e tyre nga konkurrentët e mundshëm duke ushtruar dhunë dhe terror.
Një zëdhënëse për NCA ka thënë: “Grupet e krimit shqiptar kanë krijuar një profil të lartë dhe shkallë të ndikimit brenda krimit të organizuar në Mbretërinë e Bashkuar dhe kanë qasje të konsiderueshme në tregun e trafikimit të drogës në Britani, veçanërisht kokainës. Ata po zgjerohen dhe rëndësia e tyre po rritet”.
Kush janë gangsterët shqiptarë?
Shumë nga anëtarët e bandës janë fëmijët e shqiptarëve që shkuan në Britani të Madhe si azilkërkues nga veriu i vendit ballkanik në fund të viteve 1990.
Duke u shfaqur si gangsterë, ata kanë postuar në rrjetet sociale foto dhe video nga aktiviteti i tyre kriminal.
Hellbanianz, e cila gjithashtu bën muzikën rep shqiptare që glorifikon drogat dhe dhunën nën të njëjtin emër, ka postuar video që tregojnë armë mbi tavolina me kuti municioni, të rrethuara me para.
Motoja e saj është: “Ne jemi Perëndia e rrugëve”.
Një anëtar i grupit është fotografuar duke mbajtur një armë gjahu, të cilën e kishte postuar në “Facebook”.
Anëtarët e burgosur të bandës kanë postuar imazhe nga qelitë ndërsa ata pinë duhan. Një anëtar i bandës, me pseudonimin Pato, mburrej në Instagram: “Burgu është bërë si shtëpi me kafene”./Përshtati: Tirana Today/
