Presidenti i FIFA-s, Gianni Infantino ka lajmëruar se në botërorin “Katar 2022” pritet që të ketë disa ndryshime të rëndësishme. Ishte programuar që shtimi i skuadrave nga 32 në 48 në Kupën e Botës të bëhej në Botërorin e vitit 2026 që do të zhvillohet në Shtetet e Bashkuara të Amerikës, Kanada dhe Meksikë, por mund të ndodhë edhe më herët.
Infantino i cili i ftuar në kongresin e konfederatës aziatike të futbollit deklaroi se shtimi i skuadrave nga 32 në 48 në Kupën e Botës mund të bëhet që në Katar 2022.
“Po është e mundur përse jo, po diskutojmë me miqtë tanë në Katar dhe shpresojmë që kjo mund të ndodhë. Por nëse përgjigja do të jetë jo do të na mbetet ndjesia që e provuam. Duhet të kërkojmë gjithmonë t’i bëjmë gjërat në mënyrën më të mirë të mundshme. Megjithatë gjithçka do të vendoset përpara startit të kualifikueseve, pra në fillim të vitit të ardhshëm”, deklaroi numri 1 i FIFA-s.
Me këtë modul do të kenë shansin për të marrë pjesë në Kupën e Botës më shumë skuadra. Kjo i jep mundësinë Shqipërisë që të shkojë në Katar apo në atë të vitit 2026, por mbetet për tu parë se si do të funksionojë skema që do të shtojë edhe 16 skuadra të tjera.
