Zbardhen detaje të tjera në lidhje me pengmarrjen e ndodhur ditën e djeshme në Kamëz.
Një 48-vjeçar nga Puka, banues në zonën e Bathores është dhunuar fizikisht nga dy persona dhe më pas është marrë peng me një automjet. Ngjarja ndodhi në orën 11:44, në rrugën “London”, në Kamëz, teksa në vendin e konfliktit janë gjetur edhe disa njolla gjaku në asfalt.
Mësohet se kanë qenë disa dëshmitarë të cilët kanë lajmëruar policinë, e cila më pas ka shkuar menjëherë në vendngjarje. Sipas atyre çfarë thanë dëshmitarët, dy persona të cilët dyshohen se kanë qenë të maskuar kanë rrahur pukjanin dhe më pas e kanë futur me forcë brenda një makine, duke u larguar me shpejtësi.
Bëhet me dije se janë kontrolluar edhe kamerat e sigurisë së bizneseve pranë vendngjarjes, por nga to është mundur të identifikohet vetëm i 48-vjeçari që u mor peng. Dyshohet se ai është shtetasi Jan Prenga. Policia ka ngritur pika kontrolli por ende nuk është zbuluar asgjë rreth vendndodhjes së autorëve apo vendit se ku mbahet pengu.
