Tetë persona janë zhdukur pasi një anije mallrash u përplas me një anije peshkimi më herët gjatë ditës së sotme pranë ishullit Hainan të Kinës jugore. Raportohet se kërkimet për ta vazhdojnë ende, ku të paktën 21 varka dhe pesë avionë janë përfshirë në përpjekjet për gjetjen e marinarëve.
Anija e kontejnerëve me flamur panamez SITC Danang u përplas me anijen e peshkimit në orën 00:15 me kohën lokale, sipas televizionit shtetëror kinez CCTV. Përplasja bëri që varka e peshkimit të përmbytet dhe tetë personat në bord ranë në ujë.
Një foto e shfaqur nga kanali tregon një varkë shpëtimi portokalli në zonën e rrënojave, por nuk mund të shihen njerëz. Shkaqet e ngjarjes janë duke u hetuar. Përplasja ndodhi rreth 40 km nga qyteti i Yinghehai, në pjesën jugperëndimore të Hainan.
