Pas zyrtarizmit të drejtorit të ri të Policisë së Shtetit, një reagim ka ardhur nga kreu i grupit parlamentar të PD-së, Enkelejd Alibeaj. Ky i fundit përmes një mesazhi në “Facebook” thekson se ndryshimet ne kupolën e policisë janë thjesht makiazhi i radhës për të mbuluar dështimet. Sipas tij, këto lëvizje në strukturën e policisë si pjesë e riciklimit të figurave të vjetra, nuk ndihmojnë në rikthimin e normalitetit të sigurisë në vend. Mesditën e sotme, ministri i Brendshëm Bledi Çuçi njoftoi emrin e drejtorit të ri të Policisë së Shtetit. Pas shkarkimit të Gledis Nanos, Muhamet Rrumbullaku do të jetë në krye të Policisë së Shtetit.
Statusi
Ndryshimet ne kupolën e Policisë së Shtetit janë thjesht makiazhi i radhës për të mbuluar dështimin e plotë të kësaj qeverie në përballje me krimin e organizuar.
Kriminaliteti në shifra alarmante, lidhjet tashmë të faktuara të segmenteve të Policisë me bandat dhe implikimi i këtyre të fundit në procesin elektoral të 25 prillit është dëshmi e qartë se Edi Rama dhe qeveria e tij e kanë të pamundur të përballen dhe aq më tepër të luftojnë me krimin.
Lëvizjet e sotme në strukturën e Policisë si pjesë e riciklimit të figurave të vjetra qartas nuk mund të ndihmojnë në rikthimin e normalitetit të sigurisë në vend. Që mbi të gjjtha është pjesë e vullnetit të munguar politik të kryeministrit dhe e hallkave që pengojnë luftën ndaj krimit dhe rikthimit të besimit të qytetarëve tek qetësia dhe rendi publik.
