I krijuar në 1956, Eurovizioni ishte festivali që do të bashkonte vendet evropiane pas Luftës së Dytë Botërore. Duke përdorur kështu artin, nëpërmjet muzikës shtetet konkurrojnë njëra me tjetrën dhe në fund zgjidhet një fitues.
Emra të ndryshëm artistësh shqiptarë kanë përfaqësuar vendin tonë, por asnjëherë nuk kemi qenë në pozicion të favorshëm për të fituar. Kjo jo për shkak të performancës së dobët, shpesh ka ardhur si pasojë e votimit jo të drejtë që bëhet. Kështu shprehen qytetarët për Tirana Today, të cilët thonë se votimi është shumë politik. Shtetet kryesisht votojnë vendet fqinje, ose ato që kanë marrëdhënie interesi njëra me tjetrën.
“Te votimi ka qenë gjithmonë pjesë politika dhe nuk jemi absolutisht të favorizuar. Nëse do të vazhdojë të bëhet në bazë të politikave edhe votimi, të mos presim ndonjë çmim të madh. Por, të shkojmë thjesht sa për emër të paktën.”
“Nuk më pëlqeu shumë pjesa e votimit, është shumë politik dhe jo i drejtë. Kështu ka qenë gjithmonë dhe ndoshta për fat të keq kështu do të vazhdojë. Sepse po ta vësh re duke u nisur nga votat e Shqipërisë, votohet Ballkani, shtetet fqinje dhe pastaj të tjerat. Ose një tjetër fakt është që ne nuk lëmë asnjëherë pa votuar Greqinë a këngëtarin që e përfaqëson atë. Dhe asnjëherë nuk kemi marr një vlerësim nga ana e tyre, duket pak inatçore.”
Këtë vit Shqipëria u përfaqësua nga Jonida Maliqi me këngën “Ktheju Tokës”. Edhe pse performanca saj u prit mjaftë mirë nga shqiptarët, por edhe ndërkombëtarët, përsëri nuk ishte as në listën e 10 këngëve të para. Ajo u rendit në vendin e 18-të nga gjithsej 26 këngë finaliste.
“Këtë vit festivali më pëlqeu shumë. ishte goxha mirë. Thjesht më erdhi keq që të paktën vendet fqinje nuk na dhanë pikët që meritonim. Mua më tepër mu duk se ishte çështje politike më tepër. Ku vendet e tjera që kishin marrëdhënie historike apo gjeografike i jepnin pikët shteteve që kishin më shumë lidhje. Prisja që Maqedonia ose Mali i Zi të na jepnin ndonjë pikë, por nuk ndodhi.”
“Kënga nuk është se më pëlqeu dhe aq shumë, por interpretimi i Jonidës ishte shumë i bukur. Me votimin nuk jam shumë dakord, sepse dihet që shtetet do mbrojnë miqtë e tyre. Ne asnjëherë nuk kemi qenë të favorizuar, jemi andej nga fundi gjithmonë.”
“Më duket se ato shtetet e bëjnë votimin shumë politik. Nuk kanë ndonjë interes për Shqipërinë, prandaj nuk e votojnë. Kishte këngë që ishin të bukura dhe që nuk më pëlqyen. Por, më erdhi pak keq që dolëm shumë poshtë. Performanca e Jonidës ishte e bukur, mendoj se duhet të ishte pozicionuar më sipër. Nëse ne çojmë atje një këngë shumë të bukur, ajo bëhet e famshme dhe ne njihemi më shumë.”/ TIRANA TODAY
