Deputeti i AAK-së, Gazmend Syla, shprehet se i ka bërë një kërkesë zyrtare kryeministrit Avdullah Hoti, për rivarrimin e heroinës Shote Galica në Kosovë.
Përmes një postimi në Facebook, Syla thotë se është marrë një vendim nga Këshilli Bashkiak i Krujës për zhvendosjen e varrit të Shote Galicës. Ai thekson se ajo duhet të pushojë në Kosovë, pranë bashkudhëtarit e bashkëluftëtarit, Azem Galica.
“Të hënën me 27 korrik, i kam adresuar një kërkesë Kryeministrit Avdullah Hoti, për të nxjerr vendim qeveritar për rivarrimin e Heroinës Qerime Halil Radisheva (Shote Galica) në Kosovë.
Këshilli Bashkiak i Krujës, ka vendosur që të zhvendos varrin e Shote Galicës në një lokacion tjetër, por, Heroina e meriton të pushojë pranë bashkëluftëtarit dhe bashkudhëtarit të saj Heroit Azem Bejtë Galica.
Një varr i zbrazët që e shihni në foto, është pikërisht vendpushimi i saj në Galicë të Vushtrrisë, pranë Azemit. Mbes me shpresë që kjo kërkesë do të realizohet”, shkruan ai në Facebook.