Kuriozitete

Demografët janë të alarmuar/ Bie jetëgjatësia në Shtetet e Bashkuara


               Publikuar në : 19:23 - 05/12/19 M D

Një studim i ri po vë alarmin lidhur me rënien e jetëgjatësisë në Shtetet e Bashkuara.

Korrespondentja e Zërit të Amerikës, Mariama Diallo foli me bashkëautorin e studimit:

Rënia e përgjithshme në jetëgjatësi i detyrohet rritjes së vdekshmërisë mes grupmoshës 24-65 vjeç, thotë Steven Woolf, bashkëautor i raportit.

“Një nga arsyet kryesore të kësaj prirjeje është rritja e numrit të vdekjeve nga mbidoza”, thotë dr. Steven Woolf i Fakultetit të Mjekësisë së Universitetit Commonwealth të Virxhinias.

Sipas qendrës për Kontrollin dhe Parandalimin e Sëmundjeve, mesatarisht, 130 amerikanë vdiqën çdo ditë nga një mbidozë opioidesh në vitin 2017. Megjithatë kjo nuk është arsyeja e vetme.

“Ka pasur një rritje të numrit të vdekjeve nga alkoolizmi, vetëvrasja, nga dhjetëra sëmundje të organeve. E kam fjalën për diabetin, sëmundjet e mushkërive, gjithsej llogaritëm 35 shkaqe vdekjeje”.

John Haaga i Institutit Kombëtar të Moshës së Shkuar thotë se kjo është e pashembullt.

“Demografët janë të alarmuar. Është një çështje shumë serioze. Nuk kemi parë një rënie të tillë të jetëgjatësisë që nga vitet e hershme të epidemisë së Sidës dhe më herët në kohën e epidemisë ndërkombëtare të gripit pas Luftës së Parë Botërore”.

Por ai thotë gjithashtu se “rënia e jetëgjatësisë është një kombinim procesi prej disa dekadash”.

“Ka vazhduar për një kohë të gjatë. Shtetet e Bashkuara ka ngecur për dekada pas vendeve të tjera për sa i takon jetëgjatësisë, duke u nisur nga parametrat e qartë të gjendjes shëndetësore”, thotë dr. Haaga.

Është e rëndësishme të trajtohen simptomat, si edhe shkaqet e problemeve shëndetësore, thotë dr. Woolf.

“Përveç hartimit të politikave për varësinë nga droga, alkoolizmin apo vetëvrasjet, duhet të ngremë pyetjen se çfarë faktorësh në kushtet e jetesës në Amerikë, i nxisin njerëzit që të kenë këto probleme? Pse kanë kaq shumë dhimbje saqë u duhet të marrin ilaçe për t’i qetësuar ato? Pse janë aq të dëshpëruar që sjell vetëvrasjet? Pse është kaq vështirë të mbahet nën kontroll diabeti”, thotë ai.

Dr. Haaga bie dakord.

“Ne shpenzojmë rreth dyfishin e mesatares së Evropës në sektorin e shëndetësisë. Është një industri prej 3.5 trilionë dollarësh në Shtetet e Bashkuara. Asnjë vend tjetër as nuk i afrohet. Por jemi mbrapa në kujdesin parandalues dhe ato që duhet të bëjnë njerëzit: aktiviteti fizik, dieta e shëndetshme, masat e hershme për problemet shëndetësore”, thotë ai.

Përfundimet e studimit janë botuar në Revistën e Shoqatës Amerikane të Mjekësisë. /VOA

Kthehu
WhatsApp Denonco ne TT