Arlind Qori, drejtues i “Lëvizja Bashkë”, komentoi në një program televiziv reagimin e ashpër të Sali Berishës ndaj disa gazetarëve që i akuzoi si të kapur nga SPAK-u. Qori tha se arsyeja pse Berisha flet kundër gazetarëve, është që të flasin për gazetarët që ata të mos flasin për të. Ai u shpreh se do të ishte i interesuar që nga Sali Berisha të merrte përgjigje për akuzat, sepse ky është detyrimi i tij dhe jo të merret me gazetarët.
“Unë nuk jam dakord me Andin që ne duhet të presim gjykimin. Çështja është shumë sensitive që të presim gjykimin.
Arsyeja pse Berisha flet kundër gazetarëve, është që të flasin për gazetarët që ata të mos flasin për të.
Do të isha i interesuar që nga Sali Berisha të merrnim përgjigje për akuzat. Ky është detyrimi i tij dhe jo të merret me gazetarët.
Unë nuk kam mendimin më të mirë të mundshëm për gazetarët e Shqipërisë, por di që ka më shumë gazetarë të ndershëm, sesa politikanë të ndershëm.
Ka gazetarë që shërbejnë qeverisë, sikundër ka gazetarë të zotit Berisha që bëjnë të njëjtën gjë.
Por, zoti Berisha i ka mjetet për të reaguar dhe nuk ka nevojë që nga një konferencë shtypi të kërcënojë. U tha do të merrem si pjesë e një organizate kriminale. Si trajtohen këta? Ky është konotacion kërcënues.
Problemi është kur ka gazetarë të padenjë që mund të shpifin kundër një partie që ka vetëm Facebook.
Isha para dy ditësh në një emision, sa hapi gojën një nga gazetarët dhe tha partia e zotit Qori ka vetëm ish-studentë të tij që ai i kërcënon me notën. E pabesueshme fare, por ai e hodhi helmin.
Asnjë nga studentët e mi nuk janë pjesë e “Lëvizjes Bashkë”.
Ishte i pilotuar, fol sa të duash ti.
Pastaj thoshte më nxirr listën e anëtarëve të partisë dhe mi numëro këto.
Unë kisha vetëm atë dritare të vogël, madje nuk e hodhën as në Youtube.
Zoti Berisha ka televizion pronë private. Përfaqësuesit e zotit Berisha mund t’i gjesh në të gjithë televizionet”-tha Qori.
