Romakët i quanin Sicarii: Ata jetonin në Palestinë, dhe qenë krahu më radikal i Zelotëve. Ata kërkonin pavarësinë politike të Judesë nga Roma. Maksimilian Robespieri, i Pakorruptueshmi (ose tirani), protagonist i Revolucionit Francez, pëlqente ta etiketonte veten një terrorist. Por kjo nofkë nuk i solli fat:ai përfundoi në bankën e të akuzuarve në korrikun e vitit 1794, me nismën e kundërshtarëve të tij politikë. Një nga popujt që ka përjetuar për herë të parë “terrorin”, ishte ai i Romës së lashtë:armiku i tij publik ishin Sicarii, krahu më ekstremist i radikalëve Zelotë, një grupim politiko-fetar hebre, mbështetës i pavarësisë së Judesë nga Roma.
Sulme me thika
Sipas historianit Titus Flavio (37-100 E.S.), Sicarii përdornin taktika jo shumë “ortodokse” ndaj armiqve të tyre. Ata sulmonin në mes të ditës, dhe godisnin tinëz në turmë duke eliminuar objektivin e tyre me një shpatë të shkurtër (sica), të fshehur nën rrobat e tyre. Ata ishin shndërruar në tmerrin e banorëve (romakë) të fshatrave hebraike, dhe në kontekstin e Luftës së Dytë Judaike kryen masakra të mëdha, sikurse qe ajo e Ein Gedit, ku ata vranë 700 gra dhe vajza, faji i vetëm i të cilave ishte origjina e tyre romake.
Publio Cornelio Taciti (55-120 E.S), i bënte ata përgjegjës për zjarret në hambaret e drithit, dhe sabotimin e furnizimit me ujë të Judesë. Simon Kananeasi, një nga apostujt e Jezusit, i përkiste sektit të fanatikëve, por ishte një “revolucionar”, dhe jo një terrorist.
Sicarii vetëvrasës
Fanatizmi i tyre ekstrem, u shfaq qartë gjatë rrethimit të Masadës, fortesa të cilën mbi 1 mijë sicarii e pushtuan në vitin 66 E.S, dhe ku ata kishin vendosur së bashku me familjet e tyre. Në vitin 73, 3 vjet pas rënies së Jerusalemit, Masada u rrethua nga ushtria romake, dhe ishte qyteti i rradhës që do të binte:duke mos pasur asnjë mundësi për t’u arratisur, sicarii filluan të kryejnë vetëvrasje masive, duke therur në fillim të gjithë gratë dhe fëmijët që gjendeshin në kala, dhe në fund veten. Ky ishte episodi që i dha fund Luftës së Parë Judaike.
Sekti i vrasësve
Fanatizmi islamik, lindi ndërmjet shekujve VIII-XIV, kur në Lindjen e Mesme u përhapën sekte si ai nizaritëve. Ata e quanin veten ismailitë, një rrymë e islamit shiit, dhe njiheshin si Sekti i Asasinëve, emri shumës i fjalës arabe Aal-Hashishiyyun, ose “ata që janë të ndërvarur nga hashashi” (me gjasë bëhet fjalë për përhapjen e thashethemeve të qëllimshme, për t’i diskredituar ata). Për të mbështetur idetë e tyre, nizaritët iu drejtuan vrasjeve politike, veçanërisht kundër sunitëve.
Terroristi
Termi “terrorist” lindi në epokën moderne, gjatë të ashtuquajturit Mbretërim të Terrorit (1793-94) pas Revolucionit Francez, kur pushteti ra në duart e revolucionarëve të krahë më radikal, jakobinëve, të cilët nuk hezituan të kryejnë ekzekutime masive të kundërshtarëve, duke përdorur gijotinën famëkeqe.
Sipas disa historianëve, ky term u fut në leksikun politik nga Jean-Lambert Tallien dhe Babeuf, dy protagonistët e Revolucionit, që folën për herë të parë për terrorizëm dhe terroristë, duke deklaruar në mënyrë eksplicite “vullnetin për të frymëzuar terrorin”. Terrorizimi mori forma më të rënda në fillimin e shekullit XX, për të mbizotëruar deri në ditët e sotme.
Në 28 qershor 1914, nacionalisti serb Gavrilo Princip, vrau gjatë një vizite që po zhvillonte në Sarajevë të Bosnje Hercegovinës Arkidukën Franc Ferdinand të familjes mbretërore Habsburgase dhe gruan e tij. Ky gjest, shkaktoi nisjen e Luftës së Parë Botërore.
Metodë luftimi
Prej atëherë “terrorist” është një etiketë, nganjëherë e përdorur gjatë rrjedhës së historisë në mënyrë të paqartë, dhe “terrorizmi” (një tjetër emërtesë) është një metodë e përdorur më shpesh në gjysmën e dytë të shekullit XIX edhe si instrument i luftës sistematike, për shembull tek motot revolucionare ruse (1878-1881), dhe aktivitetet e nacionalistëve radikalë irlandezë, maqedonas, serbë dhe armenë.
Ai është përdorur si një mjet deri në ditët e sotme, duke shënjuar pjesën më të rëndësishme të ngjarjeve historike të 100 viteve të fundit:sulmet e anarkistëve në fillimet e viteve 1900, atentati në Sarajevës në 1914 -ën, “Vitet e Plumbit” gjatë periudhës 1970-980 në Itali, organizata terroriste baske ETA në Spanjë, Ushtria Republikane Irlandeze (IRA), sulmet me avionë të 11 Shtatorit 2001 Shtatorit në SHBA, deri me sulmet e muajve dhe ditëve të fundit anembanë globit.
Përshtati për Tirana Today, Alket Goce
