Futbollistët e kombëtares shqiptare kanë pësuar një rritje në vlerësimin e bërë nga observatori i Futbollit (CIES). Listë që publikohet çdo muaj dhe duket se nuk ka ndryshim të madh për legjionarët e Kombëtares. Është sërish mbrojtësi i Napolit, Elseid Hysaj që mbanë vendin e parë, si lojtari më i kushtueshëm, i cili ka pësuar një rritje nga 67.2 në 68 milionë euro.
Nga ana tjetër, një rritje e ka pësuar edhe Thomas Strakosha, i cili vlen 29.8 milionë euro falë paraqitjeve në nivelin e duhur këtë muaj, ndërsa më parë vlerësohej me 28.9 milionë euro. Futbollisti i tretë më i kushtueshëm i Shqipërisë, është gardiani i Kombëtares, Etrit Berisha.
Ky i fundit ka pësuar një ulje të vlerësimit, ndryshe nga dy të parët pasi vlerësohet me 11.5 milionë euro, ndërsa më parë shifra ishte në 12.2 milionë euro. Futbollistët e tjerë të Kombëtares vazhdojnë në kufirin e ulët të vlerësimit që nuk e kalon 3.4 milionë euro, shifër kjo e mbajtur nga Armando Sadiku. Gjithashtu, në këtë listë është i përfshirë edhe talenti i Wolfsburgut, Rexhbecaj, i cili kushton 2.7 milionë euro.
