Protesta dy ditore për Klodian Rashën, përfundoi me një bilanc të rëndë. Shumë persona të dhunuar, të lënduar. Shumë të tjerë në burg, e po kështu disa të tjerë në arrati. Gjatë protestave, policia përdori gaz lotsjellës për të larguar turmën. Por populli mjaft i revoltuar hodhi gurë e mjete të forta drejt institucioneve, si në shenjë kambane alarmi se dhuna e policisë ishte e patolerueshme ndaj një personi që kishte thyer rregullin për të blerë një paketë cigareje.
Ndryshe nga çfarë kemi parë videot virale, ku shumë qytetarë janë dhunuar në mënyrë brutale nga ana e policisë, ka edhe nga ato skena që janë tejet qesharake.
Ndërsa situata u kishte ikur nga duart, e të përballur me popullin e revoltuar, policia e pajisur me shkopinjtë e gomës kanë marrë çfarë u ka dalë përpara. Një person i cili ishte duke qëndruar në heshtje, e po shihte policinë e cila shpërndahej ngado për të qetësuar turmën, për fat të keq u godit nga kolegët e tij.
Në pamje duken forca të policisë me skafandra, që godasin kolegun e tyre. Ky i fundit ulëret dhe thotë: “Jemi koleg, oo, jemi koleg”.
