Ministri në Detyrë për Evropën dhe Punët e Jashtme Gent Cakaj, në kuadër të vizitës së tij zyrtare në Shkup, zhvilloi një takim me Kryetarin e Bashkimit Demokratik për Integrim, Ali Ahmetin.
”Ai ka luajtur një rol jashtëzakonisht të rëndësishëm dhe ka dhënë një kontribut shumë të vyer në procesin e integrimit të shqiptarëve në institucionet shtetërore, ngritjen e përfaqësimit të tyre në politika qendrore, mbështetjen e anëtarësimit të Maqedonisë së Veriut në NATO dhe procesit të anëtarësimit në Bashkimin Evropian’’, shkruan Cakaj në Facebook.
Ministri bën me dije se mes të tjerash, gjatë bisedës u theksua edhe rëndësia e patjetërsueshme e faktorit shqiptar në Maqedoninë e Veriut dhe domosdoshmërinë e mbylljes së bisedimeve mes Republikës së Kosovës dhe Serbisë me njohje të ndërsjellë.
Cakaj garanton se Shqipëria do të vazhdojë të luajë rolin e saj aktiv në forcimin e faktorit shqiptar dhe punën e saj konstruktive për thellim të bashkëpunimit rajonal dhe zhvillim të fqinjësisë së mirë.
