Kryeministri Edi Rama ka reaguar pasi Bullgaria dha sot “dritën jeshile”, se do të heqë veton ndaj Maqedonisë së Veriut, duke i dhënë kështu shpresa edhe Shqipërisë në integrimin në BE. Kreu i qeverisë shqiptare ka konfirmuar pjesëmarrjen në samitin e BE-së që mbahet më 23 dhe 24 qershor në Bruksel, pas lajmeve për të votuar pro heqjes së vetos ndaj Maqedonisë së Veriut. Siç duket, qëndrimit të Ramës do t’i bashkohen edhe Serbia dhe Maqedonia e Veriut. Një ditë pasi tre liderët e vendeve të Ballkanit deklaruan se po shqyrtojnë mundësinë për të marrë pjesë në mbledhjen e Këshillit të Europës, kryeministri Edi Rama ka konfirmuar se Shqipëria do të marrë pjesë në këtë Samit.
“Sapo dëgjova që diçka po lëviz sot në Bullgari. Shumë herët për të qenë optimist dhe shumë pak për të ndryshuar pjesën e fjalimit të nesërm ku Bullgaria kritikohet si një vend që ka rrëmbyer dy vende të NATO-s, ndërkohë që ka një luftë të nxehtë në kufirin e Evropës!
Ne do të marrim pjesë në mbledhjen e Këshillit të BE-së. Nuk do të ketë shumë për të dëgjuar për ne, por ne do të kërkojmë të dëgjohemi për idenë e një Komuniteti të Ri Politik Evropian që ne mbështesim, për Ballkanin e Hapur që çon përpara frymën e Evropës dhe për rrëmbimin tonë nga Bullgaria që shkatërron atë”, shkruan Rama në Twitter.