Ndeshja e cila u zhvillua një natë më parë mes Malit të Zi dhe Kosovës u shoqërua e polemika të shumta pasi trajneri i skuadrës malazeze dhe 2 lojtarë nuk u paraqitën.
Trajneri Ljubisha Tumbakoviç dhe dy lojtarët Filip Stojkoviç dhe Mirko Ivaniç, të tre të lindur në Serbi, nuk u paraqitën në fushën e lojës kundër Kosovës për shkak të presioneve serbe.
Menjëherë ka ardhur vendimi nga Federata e Futbollit të Malit të Zi e cila ka vendosur ta shkarkojë menjëherë trajnerin Tumbakovic për “shkelje të detyrimit profesional të parashtruar në kontratë”.
“Presioni i qarqeve serbe bëri të vetën dhe triumfoi ndaj futbollit”, shkroi dje gazeta malazeze “Vijesti”, duke iu referuar mosparaqitjes së trajnerit dhe 2 lojtarëve me origjinë serbe në këtë ndeshje.
Kujtojmë se mediat serbe dje, konkretisht “Informer” para fillimit të ndeshjes iu ka bërë një thirrje lojtarëve me origjinë serbë të Malit të Zi, që të mos pranonin të luanin kundër Kosovës.
“Nëse jeni serbë, nuk duhet të luani kundër Kosovës. Pesë nga lojtarët tanë të Malit të Zi nuk duhet të kenë asnjë dilemë të premten. Serbë, tani tregoni se nderi juaj është më i rëndësishëm se çdo gjë! Trajneri Lubisa Tumbakovic dhe lojtarët e tij, Mirko Ivanic, Filip Stojkovic, Vukan Savicevic, Adam Marusic dhe Marko Simic, kanë lindur në Serbi. Ivanic ka lindur në Backi Jarak, Filip Stojkovic në Cuprija, ndërsa Vukan Savicevic, Adam Marusic dhe Marko Simic në Beograd. Ata të gjithë zgjodhën të luanin për Malin e Zi, sepse mendonin se në kombëtaren e Serbisë nuk do të kishin hapësirë”, shkruhej në postimin e Informer.
Në prag të sfidës ndaj Çekisë, Malin e Zi do ta drejtojë dyshja Xhudoviç-Lekoviç. Ndeshja e cila mbaroi me rezultatin 1-1 u luajt në kuadër të eliminatoreve të ‘Euro2020’.
