Edhe ditën e sotme maturantët bllokuan rrugët duke protestuar.
Ata u shprehën se provimi i Letërsisë dhe Gjuhës Shqipe nuk ishte aspak normal dhe nuk përputhej me përgatitjen që ata kishin bërë përgjatë vitit.
Maturantët i drejtuan Ministrisë dy kërkesa: rivlerësimin e provimit dhe uljen e pragut të notës 9 dhe 10.
Ndërkohë së fundmi ka ardhur një reagim nga MASR.
Ministria e Arsimit, Sportit dhe Rinisë me anë të zëvendësministres Nina Guga iu ka bërë thirrje maturantëve që të lënë pas shqetësimet e ditëve të fundit dhe të përgatiten për provimet e ardhshme.
Guga deklaroi se problematikat e ngritura janë adresuar në QSHA, duke shtuar se së shpejti do të ketë analizë nga grup ekspertësh dhe njoftim publik për gjetjet.
“Si një ish-drejtore gjimnazi që kam qenë shumë afër jush dhe kemi ndarë e zgjidhur bashkë situata të ndryshme dhe sot në cilësinë e zëvendësministres, ju siguroj se problematikat që ju keni sjellë në lidhje me testin janë adresuar në Qendrën e Shërbimeve Arsimore, e cila do të analizojë në grup ekspertësh dhe do të bëjë njoftim publik për gjetjet.
Nëse testi rezulton të ketë qenë kaq i vështirë sa shumë nxënës nuk kanë arritur ta realizojnë, ky cut-off do të lëvizë për të gjithë. Por, siç ju ka shpjeguar Qendra e Shërbimeve Arsimore, kjo bëhet në fund, kur analizohen rezultatet.
Korrigjimi i testit në mënyrë digjitale është një korrigjim jo-subjektiv dhe transparent që shmang çfarëdo gabimi të mundshëm dhe jep një rezultat më të shpejtë në kohë”, pohoi Guga.